“Karyeramın əvvəlindəki Kərəmlə indiki Kərəm arasında böyük fərq var. İlk illərimdə düşünmədən və duyğularıma qapılaraq qərarlar verirdim. Gənclik atəşi ilə bəzi səhvlər edirdim. Geriyə boylananda indiki ağlım və təcrübəmlə həmin səhvləri rahat şəkildə görə bilirəm. Gənc futbolçular soyuqqanlı olmağa çalışmalı və qərarları soyuq başla verməlidi. Bilirəm ki, bunu dildə demək asandı. Amma gənclərə məsləhətim məhz budu. Kosovo ilə oyunda vurduğum qol zamanı (Orkun Kökçünün zərbəsindən sonra – red.) topun “çərçivə”yə yox, kənara getdiyinə əmin idim. Bunu ilk dəfə açıqlayıram. Hətta Orkunla da bunu müzakirə etdik. O da eyni şeyi söylədi. “Çərçivə”yə gedəcəyinə əmin olmaq üçün son anda topa toxundum. Qoldan sonra komanda yoldaşlarım ofsaydda olub-olmadığımı soruşdular. Həmin an 5-10 saniyə narahatlıq keçirdim. Ancaq qolu kimin vurması önəmli deyil. 24 ildən sonra mundiala yollanmağımız daha önəmlidi. “Beşiktaş”la derbinin son anlarındakı penalti çox məsuliyyətli bir an idi. Elə bir zərbə idi ki, ya tarix yazacaqsan, ya da tarix olacaqsan. Böyük ehtimalla indiyə qədər karyeramda vurduğum ən çətin penalti idi. Qoldan sonra o qədər sevinc yaşadım ki, biranlıq özümə nəzarəti itirdim. Adətən, bu qədər çılğın hərəkətlər etmirəm. Amma həmin an kameraya zərbə vurdum. O zərbə də təhlükəsizlik xidməti işçisinin qoluna dəydi. Ondan üzr istədim. Həmin an insan tam fərqli emosiyalar yaşayır. Qışqırmağa, çığırmağa başlayırsan. Heç nə ilə müqayisə olunmayacaq bir adrenalindi. Keçmiş Kadıköy ruhunun geri dönməsini istəyirəm. Uşaq vaxtı hər dəfə bu stadiona gələndə fanatların coşqusu, dəstəyi məni valeh edirdi. Tüklərim biz-biz olurdu. “Fənərbaxça” fanatlarını çox sevirəm. Bura gəldiyim ilk gündən məni dəstəkləyirlər. Onların sevgisini həmişə hiss edirəm. Mən də bu sevgiyə layiq olmaq və ona qarşılıq vermək üçün meydanda əlimdən gələni edirəm. Transferin ilk günündən söz-söhbətdən uzaq durmağa çalışdım. Yalnız öz oyunumla müzakirə olunmaq istədiyimi dilə gətirdim. “Fənərbaxça” fanatları da bunu gözəl bilir. Yığmanın düşərgəsindən qayıdandan sonra həyat yoldaşım mənə xoş xəbəri çatdırdı. Həmin an adam duyğularına hakim ola bilmir. Nə deyəcəyini də bilmirsən. Ata olanlardan əsasən “indi tam dərk etmirsən, uşaq doğulandan sonra anlayacaqsan” sözünü eşidirəm. İçimdə xoş bir həyəcan var. Allah bizə o uşağı sağlam şəkildə qucağımıza almağı nəsib etsin. Eləcə də Allah uşaq həsrətində olan hər kəsi sevindirsin”.