Kərəm Aktürkoğlunun transferiylə bağlı “Benfika” ilə “Fənərbaxça” arasında razılıq əldə olunduğunu xəbər vermişdik.

Komandanı Çempionlar Liqasından etməsinə baxmayaraq, fanatların yolunu səbirsizliklə gözlədiyi türkiyəli ulduz, nəhayət, İstanbula gəldi. Özəl təyyarəylə klub rəsmisi Hakan Safi ilə birlikdə İstanbula gələn 26 yaşlı futbolçunu hava limanında ailəsi, klubun digər üzvləri və fanatlar qarşıladı.

“Fənərbaxça” şərfini dərhal boynuna keçirən Kərəm ilk açıqlamalarını klubun rəsmi kanalına verdi. Ulduzu “Qalatasaray”da parlamış bir futbolçunun “Fənərbaxça”nı Türkiyənin ən böyük və ən şərəfli klubu adlandırması belə görünür, uzun müddət unudulmayacaq:

Beləliklə, ötən yay 12 milyon avro qarşılığında “Qalatasaray”dan “Benfika”ya yollanan Türkiyə yığmasının üzvünün Portuqaliya macərası cəmi bir il çəkdi. Kərəm “Benfika” karyerasını 58 rəsmi oyun, 17 qol, 13 məhsuldar ötürmə göstəriciləri və iki titulla tamamladı.

Yeri gəlmişkən, Kərəmin birinci transfer haqqına sahib olan “Qalatasaray” “Benfika”ya yekun qərarını bildirmək üçün 5 iş günü, yəni sentyabrın 5-nə qədər gözləsəydi, “Fənər” bu futbolçunun adını avrokubokların iştirak ərizəsinə sala bilməyəcəkdi! Amma “Qalatasaray” Kərəmə maraq göstərmədiyini dərhal lissabonlulara bildirdi. Transfer dönəminin sonuna yaxın fəallaşan “sarı-lacivərdlilər” Kərəmdən başqa PSJ-dən Marko Asensio və “Mançester Siti”dən qapıçı Ederson kimi tanınmış isimlərin də keçidini tamamlayıb. Asensio və Ederson da İstanbula gəlib. Bu transferlərin detalları barədə məlumat verəcəyik.

“Fənərbaxça”nın qarşıdakı günlərdə öz stadionunda Kərəm, Asensio və Ederson üçün təmtəraqlı imza mərasimi keçirəcəyi gözlənilir.