Argentinada Dieqo Maradonanın ölümü ilə bağlı məhkəmə davam edir. Əfsanəvi futbolçunun müəmmalı ölümü yeni prosesin başlamasına da rəvac verib.

"Football-plus.az" xəbər verir ki, “Reuters” agentliyinin yaydığı xəbərə görə, cinayət işi üzrə futbolçunu əməliyyat və müalicə edən tibbi heyətin 7 üzvü ehtiyatsızlıqdan adam öldürməkdə ittiham olunur.

Xatırladaq ki, Maradona 2020-ci il noyabrın 25-də 60 yaşında beyin əməliyyatından sonra bərpa dövründə olarkən ürəktutmasından vəfat edib. Yeni məhkəmə prosesi zamanı təxminən 100-ə yaxın şahidin ifadəsi dinləniləcək.

Araşdırma futbolçunun ölümünə səbəb ola biləcək tibbi səhlənkarlıq iddiaları ətrafında aparılır. Ancaq tibbi heyət bütün ittihamları rədd edir. Müdafiə tərəfi futbolçunun uzun illər davam edən sağlamlıq problemlərinə görə ölümünün qaçılmaz olduğunu iddia edir.

Xatırladaq ki, səhlənkarlıq ittihamı 2021-ci ildə aparılan tibbi komissiya araşdırmasından sonra irəli sürülüb. Komissiya tibbi heyətin “uyğunsuz, qeyri-peşəkar və məsuliyyətsiz” davrandığı qənaətinə gəlmişdi.

Təqsirləndirilən şəxslər günahkar bilinərsə, onları 8 ildən 25 ilədək həbs cəzası gözləyir.