Maradonanın oğlundan həkimlərə ağır ittihamlar
Argentinada əfsanəvi Dieqo Maradonanın ölümü ilə bağlı məhkəmə prosesi davam edir.
Bu arada dahi futbol ulduzunun oğlu Dieqo Maradona Sinaqra diqqətçəkən açıqlamalar verərək atasının ölümündə həkimləri günahlandırıb.
''Football-plus.az'' xəbər verir ki, Maradona 2020-ci ilin noyabrın 25-də beyin əməliyyatı keçirdikdən və evə buraxıldıqdan bir neçə gün sonra ürəktutması üzündən dünyasını dəyişmişdi. Onun ölümü futbol dünyasında böyük üzüntü yaratmış və Argentinada 3 günlük matəm elan olunmuşdu.
7 həkimin ''ehtiyatsızlıq üzündən adam öldürmə'' maddəsi ilə məhkəməsi davam edir. Günahkar olduqları sübuta yetiriləcəyi təqdirdə onlara 8 ildən 25 ilədək həbs cəzası verilə bilər. İspaniya kanallarından birinə açıqlamalar verən Dieqo Maradona Sinaqra atasının ölümü ilə bağlı ağır ittihamlar səsləndirib:
''Məhkəmənin gedişatını diqqətlə təqib edirəm. Hər birimiz üçün çox çətin bir dönəmdi. Əsas çətinlik hələ irəlidədi. Amma psixoloji cəhətdən buna hazırıq. Məni ən çox üzən məqam odu ki, bu insanlar atamı öldürdülər. Bu, açıq-aydın görünür. Onlar ona yaxşı baxmadılar və lazımi səviyyədə qulluq göstərmədilər. Həyatda qalması üçün heç nə etmədilər. Müalicə prosesi düzgün aparılsaydı, atam indi burda bizim yanımızda əyləşərdi. Həkimlərin onun həyatda qalması üçün heç nə etməmələri faktını qəbul edə bilmirəm. Əminəm ki, məhkəmədə onların öz işinə məsuliyyətsiz yanaşdıqlarını sübut edə biləcəyik. Atamdan uzun illər istifadə edildi. Pulları mənimsənildi. Sonda ölümündən də kimlərsə, faydalandı. Səbəbini bilmirəm. Atamın həyatının son günlərində həkimlərin və onları təyin edən insanların hərəkətləri başqa cür düşünməyə imkan vermir''.
Digər xəbərlər
