Dieqo Maradonanın ölümü ilə bağlı araşdırma yekunlaşıb. Nəticə olduqca maraqlıdı.

Xatırladaq ki, Argentina və dünya futbolunun əfsanəsi 2020-ci il noyabrın 25-də 60 yaşında vəfat edib. Rəsmi məlumatda onun xroniki ürək çatışmazlığından öldüyü bildirilmişdi. Lakin sonradan onun ölümünə həkimlərin səhlənkarlığının səbəb olmasıyla bağlı iddialar səslənmişdi. Bu iddialar əsasında təhqiqat aparan prokurorluq 8 nəfərə qarşı qəsdən adam öldürmə ittihamı irəli sürüb. “La Gazzetta dello Sport”un məlumatına görə, Maradonanın həkimi, onunla işləyən psixiatr və daha altı tibb işçisi məhkəmə qarşısına çıxacaq. İttiham təsdiqini taparsa, onları 5 ildən 25 ilə qədər həbs cəzası gözləyir. Prokurorluğun gəldiyi qənaətə görə, həkimlərin işinə səhlənkar və ehtiyatsız yanaşması “Ximnasiya”nın sabiq baş məşqçisinin ölümü ilə nəticələnib. Hüquq-mühafizə orqanı əməkdaşlarının fikrincə, düzgün tibbi müdaxilə ilə Maradonanı həyatda saxlamaq olardı. Argentina ictimaiyyətinin səbirsizliklə gözlədiyi məhkəmənin vaxtı hələ ki müəyyənləşməyib.