Argentinada Maradonanın həkimlərinin məhkəməsi başladı
Əfsanəvi Dieqo Armando Maradona 2020-ci il noyabrın 25-də - 60 yaşında həyatdan köçdü.
"Football-plus.az" xatırladır ki, onun cansız bədəni baş beynindən trombun götürülməsi üçün keçirilən əməliyyatdan sonra bərpa olunduğu Buenos-Ayresdəki evində aşkarlandı. Bu tromb isə yasaq maddələr və alkoqol ilə uzunmüddətli mübarizədən sonra yaranmışdı. Həkimlər əvvəlcə futbol əfsanəsinin ürəktutmasından sonra keçindiyini desələr də, əslində vəziyyət bir qədər dolaşıqdı. Və indi Argentinada həkim ordusu üzərində məhkəmə başlayıb. Ölümdən 4,5 il sonra...
Koronavirus pandemiyasının qızğın çağında dünyadan köçən Maradonanın ölümü ölkəni dərin matəmə qərq etdi. Futbolçunun Prezident Sarayında qoyulan nəşi ilə vidalaşmaq üçün minlərlə adam ora baş çəkdi. Dəfn mərasimindən sonra araşdırmaya başlayan polis isə bu qənaətə gəldi: Dieqo ağciyər ödəminin və həkim səhlənkarlığının qurbanı olub. Tibb bacılarından biri isə etiraf etdi ki, “Maradonanı oyatmamaq əmri alıb”.
“Napoli”nin və dünya futbolunun əfsanəsinin ölümündən 4,5 il sonra yeddi tibb işçisi məhkəmə önünə çıxarılıb: neyrocərrah Leopoldo Luka, psixiatr Aqustin Kosaçov, psixoloq Karlos Dias, tibbi əlaqələndirici Nensi Forlini, tibb bacıları üzrə bölmənin əlaqələndiricisi Mariano Perroni, həkim Pedro Pablo Di Spanyi, onun yardımçısı Rikardo Almiro. Günahları sübuta yetiriləcəyi təqdirdə onların hər birini 8 ildən 25 ilə qədər həbs cəzası gözləyir. Daha bir tibb bacısı – Gizela Dahiana Madrid isə andlılar məhkəməsinin ayrıca keçirilməsini xahiş edib.
Əfsanənin ölümü Argentina xalqını iki düşərgəyə bölüb. Düşərgələrdən biri Maradonanın ölümündə həkimlərin heç bir günahının olmadığını iddia edirsə, o biri tibb işçiləri ilə hesablaşmağı tələb edir. Tacir Luis Alberto Suares “Reuters” agentliyinə belə deyib:
“Ədalətin zəfər çalacağına ümid edirəm. Onlar Maradonanı öldürüb. Dieqo yaşamalıydı. Həkimlər onun qayğısına lazımi şəkildə qalmayıb”.
Bank sektorunda çalışan Martin Miley isə fərqli fikirdədi:
“Mən yalnız kənardan gördüklərim haqda danışa bilərəm. Biz həkimlərin səhv edib-etmədiyini yüzfaizlik əminliklə deyə bilmərik. Geri baxarkən onların haqlı olub-olmadığını demək çətindi. Ancaq düşünürəm ki, Maradonanın ölümündə məhkəmə önünə çıxarılanlardan daha çoxunun günahı var”.
Maradonanın qızı Dalmanın dediyinə görə, məhkəmə prosesinin başlamasına az qalmış bütün ailə güclü mafiyə qarşısında qorxu hissi keçirməkdədi. Mərhum futbolçunun ailəsi ölümdə günahı olanların ədalətli cəza alması üçün mübarizəyə girişərkən bəzi təhlükəli adamların təzyiqi ilə üzləşib:
“Anam narahatdı. O, mafiyadan – hər şeyə nəzarət edən, pulu və hakimiyyəti olan adamlardan qorxur. Ancaq mənim vecimə də deyil. Düşmənlərimin kim olduğunu bilirəm, ancaq susa bilmərəm. Adamların gerçəyi bilməsinə nail olmalıyıq. Anam həmişə mənə deyir ki, “səsini kəs, heç nə demə, qorxuram”. Ancaq mən bunu bacarmaram. Atama borcum var. Xalqın dəstəyini hiss edirəm və bilirəm ki, bu mübarizədə tək deyilik. Ancaq yenə də çətindi. İctimaiyyət sənin tərəfində ola bilər. Sadəcə, kimlərsə sənin yoxa çıxmağını sifariş edə bilər”.
Təbii ki, məhkəmə prosesi uzun çəkəcək. Maradonanın ailə üzvləri və uzun müddət onun sağlamlığının keşiyində duran həkimlər də qarışıq 192 adam şahid kimi dindiriləcək. Dinləmələr həftədə üç dəfə olacaq. Prosesin ən azı iyulun ortalarına qədər uzanacağı gözlənilir. Prokurorlar artıq həkimləri evdə Dieqo ilə ehtiyatsız davranmaqda və qeyri-adekvat müalicə etməkdə suçayır. Onlar iddia edirlər ki, futbol əfsanəsi ölümündən əvvəl "uzun, ağrılı dövr" üçün taleyin ümidinə buraxılıb. İttiham olunanların vəkilləri bu iddianı rədd edir. Futbolçunun ailəsi isə düşünür ki, həkimlər maddi mənfəət üçün onun həyatının təhlükə altında olmasına məhəl qoymayıblar.
Proses təkcə Argentinada yox, bütün dünyada maraq doğurub. Təbii ki, DÇ-86-nın qalibinə vətənində az qala Allah kimi yanaşırlar.
Digər xəbərlər
