Luçano Spalletti ilə bağlı gəzən şayiələrə birdəfəlik son qoyulub. O, “Yuventus”u yayda tərk etməyəcək.

"Football-plus.az" xəbər verir ki, baş məşqçi Turin klubu ilə müqaviləsinin müddətini uzadıb. İtaliya klubunun mətbuat xidmətinin məlumatına görə, 67 yaşlı mütəxəssisin müddəti mövsümün sonunda başa çatacaq sözləşməsi daha 2 il artırılıb.

Spalletti 2025-ci ilin oktyabrında “Yuventus”un baş məşqçisi təyin olunub. Komanda A seriyasında 32 turdan sonra 60 xalla turnir cədvəlinin 4-cü pilləsində qərarlaşıb.

Yeri gəlmişkən, “Liverpul”un qapıçısı Alisson Bekker karyerasını böyük ehtimalla İtaliyada davam etdirəcək. “La Gazzetta dello Sport”un məlumatına görə, 33 yaşlı futbolçu “Yuventus”a keçidə razılıq verib.

Turin təmsilçisinin futbolçunun nümayəndələri ilə apardığı danışıqların müsbət nəticələndiyi qeyd olunur. Klub rəhbərliyi hazırkı qapıçı Mikele Di Qreqorio ilə yolları ayıraraq onun yerinə Alissonu gətirmək niyyətindədi.

Qeyd edək ki, Alisson bu mövsüm “Liverpul”un heyətində bütün turnirlərdə 34 oyuna çıxıb, 36 qol buraxıb və 13 matçda qapısını toxunulmaz saxlayıb.

“Transfermarkt” portalına görə, onun bazar dəyəri 17 milyon avro təşkil edir.