Viktor Osimhenin kölgəsindən heç cür qurtula bilməyən, son vaxtlar gözdən düşən və məşqçilər korpusu ilə də münasibətləri soyuyan ''Qalatasaray''lı Mauro İkardi ilə bağlı sürpriz xəbər yayılıb.

"Football-plus.az"ın məlumatına görə, argentinalı forvard imic haqlarının ödənilməməsi üzündən ''Qalatasaray''a xəbərdarlıq məktubu göndərib!

Müqavilə müddəti bitmək üzrə olan, üstəlik kapitan sarğısını daşıyan 33 yaşlı futbolçunun bu addımı birmənalı qarşılanmayıb. İstanbul nəhəngi ilə iki il öncə üçillik müqavilə imzalayan İkardi ilə 10 milyon avro qazanır. Bu pulun 6 milyon avrosu maaşdısa, 4 milyon avrosu imic haqqıdı. Problem ondan qaynaqlanır ki, həmin imic haqqının böyük hissəsini klubun sabiq rəsmisi Ərdən Timur ilə ''Eyüpspor''un prezidenti (!) Murat Özkaya ödəyir. Amma onların hər ikisi hazırda həbsdədi! Bu üzdən İkardiyə edilməli olan ödənişlərdə gecikmələr yaşanır. İmic anlaşması klubun özü ilə yox, ayrı-ayrı şəxslərlə imzalanıb. Ona görə də belə bir problem ortaya çıxıb.

Bu, İkardinin ilk belə hərəkəti deyil. O, keçmişdə də maaşını vaxtında ala bilmədiyinə görə ''Qalatasaray''a xəbərdarlıq məktubu göndərmişdi. Həmin vaxt rəhbərlik konkret tarix qeyd etməli və pulu həmin tarixə qədər ödəməli olmuşdu.

Qeyd edək ki, İkardi bu mövsüm 39 rəsmi oyunda 15 qol vurub. Osimhenin qolu qırıldığından qarşıdakı ən azı 2-3 oyunda komandanın qol yükünü məhz bu futbolçu daşımalı olacaq.