Son vaxtlar Okan Burukla münasibətləri soyuyan Mauro İkardi ilə bağlı yeni transfer iddiaları ortaya atılıb.

"Football-plus.az" xəbər verir ki, ağır zədədən qayıtdıqdan sonra pis məhsuldarlıq sərgiləməyən argentinalı forvard həm ''Liverpul'', həm də ''Beşiktaş''a qarşı vacib oyunlarda ehtiyatda qalmış və narazılığını gizlətməmişdi.

Təcrübəli hücumçunu narazı salan daha bir məqam müqavilə müddətidi. İkardinin müqaviləsi mövsümün sonunda başa çatacaq. Rəhbərlik isə ona yeni müqavilə təklif etməyə tələsmir. ''Qalatasaray'' sonrakı addımını İkardinin bu mövsümkü performansına baxdıqdan sonra atacaq. Yəni yanvardan etibarən tanınmış futbolçunun istədiyi klubla danışıqlar aparmaq hüququ olacaq.

Bu arada Türkiyə mətbuatının iddiasına görə bir neçə klub İkardinin durumu ilə yaxından maraqlanır. Bunların arasında ''Torino'' olduğu iddia edilirdi. Amma italiyalı insayder Nikola Skira turinlilərin bu futbolçuya maraq göstərmədiyini bildirib. ''Amerika'', ''Estudiantes'' və ''Penyarol'' isə argentinalı hücumçu ilə ciddi maraqlanır.

Bu arada Səudiyyə Ərəbistanı təmsilçisi ''Neom''un da adı hallanmağa başlayıb. Bu klub ''Qalatasaray'' fanatlarına artıq tanışdı. 1 ay öncə ''Neom'' 40 milyon avroya yaxın məbləğ təklif edərək ''Cim-Bom''un digər ulduzu Barış Alpər Yılmazın belə desək, ağlını başından çıxarmışdı. Hətta məşqlərə çıxmaqdan imtina edən bu istedadlı futbolçunun bir ayağı artıq Səudiyyə Ərəbistanında idi. Amma ''Qalatasaray''rəhbərliyi maaşını artıraraq Barışı böyük çətinliklə son anda heyətdə saxlaya bildi. İndi də ''Neom''un yanvarda İkardiyə illik 10 milyon avro maaş olmaqla ikiillik müqavilə təklif edəcəyi bildirilir.

Qeyd edək ki, ''Qalatasaray'' tarixinin ən məhsuldar ikinci əcnəbi futbolçusu statusunda olan İkardi bu mövsüm 9 rəsmi oyunda 5 qol vurub.