Çempionlar Liqasında çərşənbə axşamı - martın 10-da Çempionlar Liqasında 1/8 final mərhələsinə start veriləcək.

"Football-plus.az" xəbər verir ki, günün ilk oyununda İstanbulda ''Qalatasaray'' ''Liverpul''u qəbul edəcək. Türkiyə çempionu ilə İngiltərə çempionunun ilk duelinin hakimi bəlli olub. UEFA Bu oyuna Xesus Xil Mansanonu təyin edib.

Tanınmış ispaniyalı hakim indiyə qədər klub və yığma səviyyəsində Türkiyə təmsilçilərinin 8 qarşılaşmasında fit sahibi olub. Qardaş ölkənin təmsilçiləri bu oyunlardan 4 qələbə, 1 heç-heçə, 3 məğlubiyyətlə ayrılıb.

Ən son Türkiyə klublarından məhz elə ''Qalatasaray'' Mansano ilə oyuna çıxıb. Ötən mövsüm Avropa Liqasının əsas mərhələsində həmin oyunda ''Cim-Bom'' Amsterdamda ''Ayaks''a 1:2 boyun əymişdi.

Mansano 2024-ün martında La Liqa çərçivəsində baş tutan ''Valensiya'' - ''Real'' oyunundakı qalmaqallı idarəçiliyi ilə gündəmi zəbt etmişdi. 2:2 hesabı ilə bitən oyunda o, 90+9-da ''Real''ın hücumu zamanı anidən final fitini səsləndirmişdi. Fitdən 1-2 saniyə əvvəl Cud Bellingemin zərbəsi qolla nəticələnsə də, Mansano qolu qeydə almamış, üstəlik etirazlara görə ingiltərəli ulduza qırmızı vərəqə göstərmişdi. Bu qalmaqaldan sonra Mansano təxminən 10 ay ''Real''ın oyunlarına təyinat almadı.