Çempionlar Liqasında əsas mərhələnin 2-ci turunun ən diqqətçəkən nəticələrindən biri İstanbulda qeydə alındı.

"Football-plus.az" xəbər verir ki, İngiltərə çempionu ''Liverpul'' ''Qalatasaray''la oyunda aşkar favorit sayılırdı. Amma qonaqlar sürpriz şəkildə bu qarşılaşmada həm qola, həm də xala həsrət qaldılar. Viktor Osimhenin 16-cı dəqiqədə penaltidən vurduğu qol oyunda yeganə oldu.

İlk turda ''Ayntraxt''a 1:5 hesabı ilə uduzan Türkiyə çempionu bu qələbə ilə turnir cədvəlindəkı durumunu bir xeyli yaxşılaşdırdı. Bu nəticə ilə ortaya bir sıra maraqlı faktlar çıxdı.

Əvvəlcə ''Qalatasaray''ın bütün turnirləri nəzərə almaqla evdəki məğlubiyyətsiz seriyanı 28 oyuna çatdırdığını bildirək. Sonuncu ev məğlubiyyətini ötən ilin avqustunda, ÇL-in təsnifatının pley-offunda ''Yanq Boys''la oyunda (0:1) yaşayan ''Cim-Bom'' fanatları önündə keçirdiyi sonrakı 28 qarşılaşmadan 21 qələbə, 7 bərabərliklə ayrılıb. Avrokuboklarda 7 oyunluq qələbəsiz seriyaya son qoyan ''Qalatasaray'' ÇL-də isə evdə 8 oyunluq qələbə həsrətini bitirdi (4 heç-heçə, 4 məğlubiyyət). Komanda bu turnirdə öz meydanında son qələbəsini 2017-də ''Lokomotiv''lə oyunda əldə etmişdi. Ən mühüm seriyalar isə İngiltərə təmsilçiləri və ''Liverpul''a qarşı olanlardı. İstanbul nəhənginin İngiltərə klublarına qarşı qələbə seriyası 2, məğlubiyyətsiz seriyası 4 oyuna yüksəldi!

Ümumilikdə, ''Qalatasaray'' ingilislərə qarşı keçirdiyi 27-ci oyunda 7-ci qələbəsini qazandı (10 heç-heçə, 10 məğlubiyyət). ''Liverpul'' yenə səfərdə bu rəqibi məğlub edə bilmədi. ''Qırmızılar'' daha öncə İstanbulda ''aslan''a qarşı 2001/02-də 1:1 bərabərə qalmış, 2006/07-də isə 2:3 məğlub olmuşdu. Yəni ''Liverpul'' tarixi ərzində ''Qalatasaray''a qarşı keçirdiyi 3 səfər oyunundan 1 heç-heçə, 2 məğlubiyyətlə ayrılıb. ''Qalatasaray'' mersisaydlıların ÇK/ÇL-də səfərdə ən azı 3 dəfə qarşılaşıb məğlub edə bilmədiyi cəmi 3 klubdan biridi.

Digərləri ''Napoli'' (3 məğlubiyyət) və ''Çelsi''di (3 heç-heçə, 2 məğlubiyyət). Onu da bildirək ki, Osimhen ÇL-də 10-cu qolunu vurdu və Obafemi Martinsi geridə qoyaraq turnirin tarixində ən məhsuldar nigeriyalı futbolçuya çevrildi.