Qarşıdakı turda Türkiyə futbolunun bir nömrəli derbisi baş tutacaq. 14-cü tur çərçivəsində ''Fənərbaxça'' ''Qalatasaray''ı qəbul edəcək.

"Football-plus.az" xəbər verir ki, oyun bazar ertəsi, yəni dekabrın 1-də keçiriləcək. Bu arada mövsümün şah oyununun hakimi açıqlanıb. Bu prinsipial derbiyə Yasin Kol təyinat alıb.

38 yaşlı trabzonlu ədalət təmsilçisi 2020/21 mövsümündən superliqa matçlarına təyinat alır. Ötən ildən başlayaraq Türkiyə Futbol Federasiyası ona bir neçə dəfə mühüm qarşılaşmalar həvalə edib. Məsələn, ''Beşiktaş'' ilə ''Qalatasaray'' arasındakı son iki derbini məhz bu ədalət təmsilçisi idarə edib. Bu mövsüm ''Rams Park''dakı oyunda 1:1-lik bərabərlik qeydə alınıbsa, ötən mövsümün 29-cu turunda ''Beşiktaş'' bu hakimin idarəçiliyində evdə ''Qalatasaray''ı 2:1 yenmişdi. Bu, ''sarı-qırmızılar''ın indiyə qədər Yasin Kol ilə 5 oyunda qeydə alınan yeganə məğlubiyyətidi (2 qələbə, 2 heç-heçə).

''Fənərbaxça'' isə Yasin Kol ilə ötən mövsüm evdə ''Beşiktaş''a minimal hesabla boyun əymişdi. ''Fənər'' bu hakimlə ümumilikdə 5 qarşılaşmadan 3 qələbə, 1 heç-heçə, 1 məğlubiyyətlə ayrılıb. Yəni qəribə səslənsə də, Yasin Kol derbilərdə bu nəhənglərdən heç biri üçün düşərli hakim deyil.