“Dünya praktikasında bunun nümunələri kifayət qədərdi. Avropanın aparıcı klubları - məsələn, “Bavariya” kimi nəhəng aşağı liqa komandaları ilə yoldaşlıq oyunları keçirməyə vaxt tapır. Bilet gəlirlərini həmin klublara bağışlayırlar və bunu futbol ailəsinə dəstək kimi qəbul edirlər. Halbuki onların oyun qrafiki bizim klublarla müqayisədə qat-qat sıxdı. Bizdə isə vəziyyət fərqlidi. Premyer-liqa klublarının həm büdcələri böyükdü, həm də oyun sayı Avropa nəhəngləri ilə müqayisədə daha azdı. Buna baxmayaraq, bu tip təşəbbüslərin şahidi olmuruq. UEFA tərəfindən ayrılan 1 milyon 600 min manat Azərbaycan futbolu üçün ciddi vəsaitdi. Bu məbləğ “Qarabağ”ın Avropadakı uğurları nəticəsində qazanılıb. Hesab edirik ki, həmin vəsaitin cəmi 600 min manatı ilə 2-ci liqadakı 12 klubun hər birinin nəqliyyat problemi həll oluna bilər. Bu böyük büdcəli klublar üçün bəlkə bir oyunçunun bir mövsümlük maaşıdı, amma 2-ci liqa klubları üçün böyük puldu. Bir avtobus bizim üçün böyük imkandı. Biz təkcə əsas komandadan ibarət deyilik. Aşağı yaş qruplarımız var, rayon və kənd uşaqları ilə işləyirik. Onları yarışlara aparırıq, seçimlərə çağırırıq, kəndlərdə yoldaşlıq oyunları təşkil edə, istedadlı uşaqları rayon mərkəzinə gətirə bilərik. Hazırda bizə ayrılan dotasiyanın yarıdan çoxu nəqliyyat xərclərinə gedir. Bir nəqliyyat vasitəsi həm maliyyə yükünü azaldar, həm də region futbolunun inkişafına real təsir göstərər. Bu təklif təkcə öz klubumuz yox, bütün 2-ci liqa klubları üçündü. Digər mühüm məsələ isə akademiyalarla bağlıdı. Təəssüf ki, bəzi böyük klublar bölgə klublarından akademiyalarına oyunçu cəlb edərkən motivasiya ödənişi etmək istəmirlər. Hətta gələcək satışdan yetişdirmə haqqı ilə bağlı maddənin müqaviləyə salınmasını istədikdə belə, oyunçudan imtina halları olur. Biz isə çox vaxt seçim qarşısında qalırıq: ya şərt qoyaq, ya da uşağın inkişafını düşünərək güzəştə gedək. Əksər hallarda uşağın gələcəyini üstün tuturuq. Bizim məqsədimiz qarşıdurma yaratmaq deyil. Sadəcə, hesab edirik ki, sistemli inkişaf üçün təməl klublara hörmət və dəstək mexanizmi olmalıdı. Çünki gələcəyin ulduzu bu gün 2-ci liqada, rayon komandasında formalaşır. Bəlkə də sabah həmin ulduz premyer-liqa klubunun siması olacaq. Hələlik bu təkliflə bağlı heç bir rəsmi reaksiya almamışıq. Cəmiyyətdə fərqli reaksiyalar var - dəstəkləyənlər də, tənqid edənlər də. Bu normaldı. Amma biz düşünürük ki, bu müzakirə Azərbaycan futbolunun gələcəyi üçün vacibdi”.