''Qalatasaray'' və ''Samsunspor''un oyunları təxirə salındı

Avrokuboklarda artıq 1/8 final həyəcanı yaşanır. Bu mərhələnin püşkü atıldı və Türkiyə iki təmsilçi ilə yola davam edir.

"Football-plus.az" xəbər verir ki, Çempionlar Liqasında ''Qalatasaray'' ''Liverpul'' ilə, Konfrans Liqasında ''Samsunspor'' ''Rayo Valyekano'' ilə qarşılaşacaq. Bu da o deməkdi ki, bu iki klubun Türkiyə çempionatının 27-ci turu çərçivəsindəki oyunları avtomatik təxirə salınıb.

Türkiyə Futbol Federasiyası daha öncə açıqlamışdı ki, Türkiyə yığmasının DÇ-2026-nın pley-offunda Rumıniya ilə oyuna daha rahat hazırlaşması üçün 27-ci turun oyunları 3 gün irəli çəkiləcək. Yəni normal şərtlərdə həftəsonu - 20-22 martda keçirilməli olan tur həftəiçi - 17-19 martda oynanılacaq. Həmin həftəiçi isə avrokuboklarda 1/8 finalların cavab oyunları nəzərdə tutulub. Ona görə də ''Qalatasaray'' ilə ''Samsunspor''un superliqa matçı keçirməsi mümkünsüzdü.

Maraq üçün bildirək ki, 27-ci turda ''Qalatasaray'' səfərdə ''Göztəpə'' ilə, ''Samsunspor'' isə səfərdə ''Çaykur Rizəspor''la qarşılaşacaq. Yəni bu oyunlar təxirə salınıb. Bu matçların yeni tarixi daha sonra federasiya tərəfindən açıqlanacaq.