Türkiyə Futbol Federasiyası (TFF) avrokuboklarda yoluna davam edən klublarla bağlı yeni qərar qəbul edib.

Bilindiyi kimi, gələn həftə avrokubokların təsnifatında pley-off mərhələsinə start veriləcək. Bu mərhələ avrokuboklarda qrup mərhələsinə vəsiqə qazanmaq və ölkəyə əmsallar qazandırmaq baxımından mühüm əhəmiyyət daşıyır. Bu üzdən TFF klub rəsmiləri ilə məsləhətləşərək onların növbəti turdakı oyunlarını təxirə salıb. Yəni klublar üçün pley-offda 1-ci və 2-ci oyunların arasına təsadüf edən dönəmdə istirahət hüququ yaradılıb.

Beləliklə, Türkiyə çempionatının 3-cü turunun “Qalatasaray” – “Qaziantep”, “Trabzonspor” – “Kayserispor”, “Samsunspor” – “İstanbul BŞ” qarşılaşmaları təxirə salınıb. “Beşiktaş”ın oyununu təxirə salmağa ehtiyac olmadı. Çünki bu komandanın onsuz da 3-cü turda oyunu yoxdu. “Fənərbaxça” isə bilindiyi kimi, “Lill”ə uduzandan sonra yoluna birbaşa Avropa Liqasının qrup mərhələsində davam edəcək. Ona görə də “Fənər”in 3-cü turda səfərdə “Çaykur Rizəspor”a qarşı keçirəcəyi oyunu təxirə salmağa ehtiyac yoxdu. TFF-dən verilən açıqlamada “Qalatasaray” – “Qaziantep” matçının 24-26 sentyabr, “Trabzonspor” – “Kayserispor”, “Samsunspor” – “İstanbul BŞ” matçlarının isə 17-19 sentyabr tarixlərindən birində oynanılacağı qeyd olunub. Dəqiq tarix daha sonra bəlli olacaq.

Qeyd edək ki, Türkiyə ötən il əldə etdiyi uğurlu nəticələrdən sonra UEFA-nın əmsallar cədvəlində 4 pillə irəliləyərək 9-cu pilləyə yüksəlmişdi. Amma bu mövsüm Türkiyə artıq indidən Çexiyanı özündən irəli buraxaraq bir pillə geriləyib və 10-cu pillədə qərarlaşıb. Növbəti Türkiyə çempionu gələn mövsüm ÇL-də birbaşa qrup mərhələsinə vəsiqə qazanacaq. 2025/26 mövsümünün də çempionunun birbaşa ÇL-in qrupunda oynaması üçün Türkiyə cari “futbol ili”ni də mütləq ilk “10-luq”da tamamlamalıdı.