Bazar günü Misli premyer-liqasında uzun müddətdi görmədiyimiz ab-hava yaşandı. “Qarabağ” – “Sabah” oyununda hakimlikdən başqa hər şey olduqca yüksək səviyyədə idi. Əsl çempionluq oyunu idi. Bir qarşılaşma maksimum bu qədər gözəl keçə bilərdi.

Oyuna yarım saat qalmış metronun “Gənclik” stansiyasının ətrafında avrokuboklarda gördüyümüz ab-hava hiss olunurdu. Bazar günü saat 18.00-dan sonra oralarda tıxac yaşanmır, amma bu dəfə var idi.

PFL-in saytında yer alan protokoldan görünür ki, oyunu 10361 azarkeş izləyib. Yeri gəlmişkən, bunların 2952-si “Sabah” azarkeşi idi. Bununla da son 8 mövsümün azarkeş rekordu təkrarlandı. Sonuncu dəfə 2017-ci il noyabrın 5-də keçirilən “Kəpəz” - “Qarabağ” (0:2) oyununda bundan da çox – 13300 azarkeş olub.

Əslində stadionda azarkeş sayı 10361-dən çox idi. Hətta 2-ci hissədə də stadiona gələnlər var idi. Matç başlayandan sonra mühafizəçilər də biletsiz gələnləri buraxırdı. Ailəvi gələnlər də çox idi.

Meydandakı gərginlik məşqçilərə də təsir etdi. Matçın sonlarında başverənlər isə heç də yaxşı mənzərə deyildi. Belə ki, Valdas Dambrauskasın əsas köməkçisi Valerio Zuddas hesab 3:3 olanan sonra Müşfiq Hüseynovun ünvanına olduqca qeyri-etik hərəkət etdi. Bundan sonra texniki zonada aləm bir-birinə dəydi. Məşqçi məşqçi ilə, futbolçu futbolçu ilə... “Qarabağ”dan Zaur Tağızadə və Müşfiq Hüseynov, “Sabah”dan isə Valerio Zuddas rəsmi xəbərdarlıq aldı.

Daha bir maraqlı məqama toxunaq. Belə oyunu Tural Qurbanov kimi gənc referiyə tapşırmaq nə dərəcədə düzgün idi? Konkret vəziyyəti ələ ala bilmirdi. Qorxurdu ki, lap ağır nəsə baş verəcək, qalacaq ortada. Ya həyəcandan, ya da nədənsə hamıdan çox oyunun bitməsini özü istəyirdi. 6 dəqiqə əlavə olunandan sonra cəmi 2 dəqiqə futbol oynanıldı. İtirilmiş 4 dəqiqəni isə kompensasiya etmədi. Heç bir tərəf oyunun bitməsini istəmirdi. 6 qol, verilən və ləğv edilən qırmızı vərəqə, gərginliyin son həddi, 10 mindən çox azarkeş - futbol adına hər şey var idi. Mövsüm ərzində 10 belə oyun olsaydı… Dambrauskas demişkən, belə səviyyədə keçən oyunlar heç də Çempionlar Liqasındakı matçlardan geri qalmır!

MÜZƏFFƏR QULUZADƏ