"Sabah" Misli premyer-liqasının 22-ci turunda "Qarabağ"la heç-heçə etdi - 3:3.

"Football-plus.az" xəbər verir ki, Masazır təmsilçisinin baş məşqçisi Valdas Dambrauskas oyunsonrası mətbuat konfransında jurnalistlərin suallarını cavablandırdı.

- Oyundan öncə məşqçilər heyəti ilə danışarkən deyirdik ki, matç 3:3, 5:5 hesabıyla bitə bilər. Əfsuslar olsun ki, hesabda 3:0 öndə olsaq da, bu üstünlüyü sona qədər qoruyub-saxlaya bilmədik. Düzdü,, bizə çətin idi. Burda "Qarabağ"ın təcrübəsi öz rolunu oynadı. Son 20 dəqiqə ərzində meydanda onların təcrübəsi danışdı. Çox üzgünük. yolunu tapıb sona qədər üstünlüyü saxlamaq lazım idi. Amma təəssüf ki, bunu edə bilmədik. Bu, bizim üçün yaxşı dərsdi, nəticə çıxarmalıyıq. Qarşıda kubok matçı var, çempionat oyunları olacaq. Bu mənada, belə vəziyyətə düşdükdə, artıq daha hazırlıqlı olmalıyıq, düzgün oynamalıyıq. Hər iki komandanı bugünkü oyuna görə təbrik edirəm. 70-ci dəqiqəyə qədər hesabda öndə olsaq da, rəqib son 20 dəqiqədə gözəl geridönüş edərək, hesabı bərabərləşdirdi. Soyuq havada stadiona gələn azarkeşlərə təşəkkür edirəm. Gəlməyənlərə görə də çox üzgünəm. Hələ də tribunada 20 minə yaxın boş yer var idi. Bəzən bu cür oyunlar Çempionlar Liqası matçlarından daha maraqlı, daha gərgin alınır. Demək olar ki, bu oyunda hər şey var idi: intriqa, dram...

- İki xal itirdiz, yoxsa bir xal qazandız?
- Oyundan qabaq soruşsaydız, fərqli cavab verərdim. Amma hesab 3:0 olduqdan sonra güzgüyə baxırıq və görürük ki, məyusuq. Biz xalları itirdik. "Qarabağ"ı gözəl geridönüşü reallaşdırdığı üçün təbrik etdim. Bu oyundan nəticələr çıxarmalıyıq. Ümid edirəm ki, bir daha belə səhvlər olmayacaq.

- Köməkçilərinizdən biri Azərbaycan futbolunun əfsanələrindən sayılan Müşfiq Hüseynova qarşı qeyri-etik hərəkət etdi. Onu cəzalandırmağı düşünürsüz?
- Biz üzr istədik. Sözün açığı, o anı görməmişdim. Çünki meydançaya köklənmişdim. Bir də gördüm ki, hər iki komandanın ehtiyat oyunçular skamyasında olanlar ayağa qalxıb və orda nəsə baş verib. "Sabah" olaraq biz heç vaxt bu cür məsələlərə tolerans göstərmirik. Bizim üçün hörmət çox önəmlidi. Feyr-pley qaydalarının hamısına riayət edirik.

- Çempionluq uğrunda mübarizə aparan komanda 12 dəqiqəyə 3 qol buraxdı. Bunun səbəbini necə izah edə bilərsiz?
- Artıq bunu başa saldım. Köklənə bilmədik, təcrübə və rəqib...

- Hesabı açan futbolçunun - Xəyal Əliyevin fasilədə əvəzlənməsi nə ilə əlaqədar idi?
- Məcburi əvəzetmə idi. Sağlamlığı ilə bağlı idi. Hətta dünən onun bu gün start heyətində meydana çıxması belə sual altında idi. Onun əvəzinə çıxan Coy-Lens Mikels 45 dəqiqə oynadı. Onun üçün risk idi. Çünki zədəsini yeni sağaldıb.

- Son dəqiqələrdə baş hakimin qərarlarına iradlarınızı bildirirdiz. Sizcə, hakim idarəçiliyi necə idi?
- Hər nə desəm də, bunun önəmi yoxdu. Çünki Hakimlər Komitəsinin sədri var və onların səhvlərindən məsuldu. Hər birimiz insanıq. Səmimi şəkildə ümid edirəm ki, istəyərəkdən səhv olmayıb, hər kəs səhv edə bilər. Bundan artıq şərh demək istəmirəm. Çünki matç da artıq başa çatıb. Öz oyunçularımı təhlil etməliyəm. Mənim onların səhvində məsuliyyətim var, hakimlərin səhvlərində də Hakimlər Komitəsinin.