"Sabah" Misli premyer-liqasının 14-cü tur matçında "Neftçi"yə qalib gəldi - 2:0.

"Football-plus.az" xəbər verir ki, "bayquşlar"ın baş məşqçisi Valdas Dambrauskas oyunsonrası mətbuat konfransında jurnalistlərin suallarını cavabladı.

- Futbolçularımı təbrik edirəm. Onlar bu gün möhtəşəm çıxış etdi. Bir məşqçi kimi hələ də inkişaf etdirmək istədiklərim var. Bugünkü davranış, yanaşma çox xoşuma gəldi. Heç bir oyunçu topdan qaçmadı. Bu cür oynayan "Sabah"ı həmişə görmək istəyirik. Azarkeşləri, rəhbərliyi, məşqçi heyəti ilə birlikdə hamını təbrik edirəm. Neytral azarkeşlər üçün də çox gərgin, maraqlı və yaxşı oyun oldu. Ən önəmli açar ilk dəqiqələrdən təşəbbüsü ələ almaq istəyimiz idi. "Neftçi" fərqli düzülüşdə idi. Start heyətində gözləmədiyimiz dəyişikliklər etmişdilər. İkinci hissədə daha yaxşı çıxış edən, topa nəzarət edən, rəqibə təzyiq edən tərəf biz idik. "Neftçi"yə topla çox oynamasına imkan vermirdik. Məni məşqçi kimi məyus və narahat edən məsələ isə qol fürsətlərini reallaşdıra bilməməyimizdi. Bəzən sonuncu ötürməni verə bilmədik, bəzən də zərbəni endirə bilmədik. Xeyli qol fürsətini qaçırdıq. Daha çox inkişaf etməliyik. Həftəsonu bizi çox çətin səfər və rəqib gözləyir. Daha sonra "Qarabağ"la önəmli oyuna çıxacağıq.

- "Turan Tovuz", "Qarabağ" və "Sumqayıt"a qarşı matçlarınız olacaq. Fasiləyə lider kimi yollana bilərsiz. Bu haqda fikriniz necədi?
- Dəfələrlə bu tip suallara cavab verəndə demişəm ki, mövsümün sonunda, ya 1-2 aydan sonra nə baş verəcəyini demək çox çətindi. Bizimçün önəmli olan sabah bərpa məşqini keçmək, istirahət etmək və növbəti matça hazırlaşmaqdı. Həqiqətən, dekabra, yanvara qədər nələr olacağını deyə bilmərəm.

- Aleksey İsayev əvvəlki zədəsini yenilədi? Durumu nə dərəcə ciddidi?
- Əvvəlki zədəsi ilə bağlı olduğunu düşünmürəm. Amma həkimlərlə danışmaq lazımdı. Fikirləşirəm ki, Aleksey bizim üçün önəmli oyunçudu. Meydançadakı keyfiyyəti ilə oyunumuza təsirini göstərir. Ümid edirəm ki, ciddi zədəsi olmayacaq.