Misli premyer-liqasının 22-ci turunda “Şamaxı” evdə “Neftçi” ilə heç-heçə etdi - 2:2.

“Football-plus.az” meydan sahiblərinin baş məşqçisi Ayxan Abbasovun oyunsonrası mətbuat konfransından hesabatı təqdim edir.

- Azarkeşlər üçün maraqlı oyun oldu. Yenə də öz meydanımızda uduzmadıq. Seriyamızı davam etdiririk. Məncə, xala layiq idik. Rəqibimiz formada idi. Yaxşı xallar qazanıb, iddialıdı. Son dəqiqələrdə ən çox qol buraxan bəlkə də bizik, amma qol da vurduq.

- Buraxılan qollarda müdafiənin səhvi var idi sanki…
- Qol buraxılırsa, müdafiə səhv edir. Topu itirdik, müdafiədə sıxlaşa bilmədik. Amma çox yorulmuşuq. Hücumda topu itirdik, çətinlik yarandı.

- “Qarabağ”la kubok oyunundan əvvəl belə tempdə oyun sizə müsbət təsir edəcək, yoxsa mənfi?
- Çətin olacaq. Bu qısa oyunları oynamalıyıq. Dünyanın hər yerində belədi. Sünidə məşq etməyimiz, oynamağımız çətindi. Fərq budu. Amma iddialıyıq.

- PFL son oyundan sonra mətbuat konfransında dediklərinizə cavab verib. Bu haqda nə deyə bilərsiz? Aydınlıq gətirsəz, olar?
- Düz deyirsiz, təəssüflənirəm ki, PFL mənə cavab verdi. Məndən də sərt danışan məşqçilər olub. Onlara niyə cavab vermədilər? PFL deyir ki, qeyri-etik danışmışam. Harda? Qeyri-etik ifadəni axtarıram. Minnət edirlər ki, meydançanı qardan təmizləmişik. PFL nə vaxt gəlib qar təmizləyib? Danışanda düz danışsınlar. Bəhlulun zədələnməsi elə Qubada başladı. Milli komandamızın üzvüdü, 6 aylığa sıradan çıxıb.

MÜZƏFFƏR QULUZADƏ