“Nottingem Forest” Vitor Pereyranın baş məşqçi postuna gətirildiyini rəsmən elan edib.

"Football-plus.az" xəbər verir ki, 57 yaşlı portuqaliyalı mütəxəssislə müqavilə 2027-ci ilin yayına qədər nəzərdə tutulub. Bu, 2025/26 mövsümündə komandanın dördüncü daimi çalışdırıcısıdı. “Meşəçilər” daha əvvəl Nunu Eşpiritu Santu, Angelos Postekoğlu və Şon Dayç ilə yollarını ayırıb.

Pereyra 2025-ci ilin noyabrında "Vulverhempton"dan göndərilmişdi. O, karyerası ərzində "Portu", "Əş-Şabab", "Flamenqo", "Korintians", "Fənərbağça", "Şanxay SIPG","Olimpiakos" və başqa klubları çalışdırıb. “Portu” onun rəhbərliyi altında iki dəfə ölkə çempionu olub. Mütəxəssis həmçinin "Olimpiakos" və "Şanxay"a da titul qazandırıb.

"Nottingem Forest" premyer-liqada 26 turdan sonra 27 xalla 17-ci pillədə qərarlaşıb.

Yeri gəlmişkən, mövsümün daha bir uğursuz komandası “Tottenhem” İqor Tudoru baş məşqçi postuna gətirib. 47 yaşlı xorvatiyalı mütəxəssis mövsümün sonuna qədər “sükan arxasında” olacaq. “Mahmızlar”ın baş məşqçi postu Tomas Frank fevralın 11-də istefaya göndəriləndən sonra boş idi.