İngiltərə premyer-liqasında hələ cəmi üç tur arxada qalıb. Bununla belə, ilk məşqçi istefası gerçəkləşdi. “Nottingem Forest” bu mənada “cığıraçan” oldu. “Meşəçilər”in rəhbərliyi Nunu Eşpiritu Santunu istefaya göndərdi, onun yerinə Ange Postekoğlunu gətirdi.

60 yaşlı yunan mütəxəssisin “meşəçilər”i çalışdıracağı ilə bağlı xəbərlər son bir neçə gündə Britaniya mediasının bəzəyi idi. “Bild” isə iddia edir ki, klub rəhbərliyi yenicə “Fənərbaxça”nı qəbul edən Domeniko Tedesko da qarışıq başqa şəxslərin də namizədliyini nəzərdən keçirib.

Avropada əsasən “Seltik” və “Tottenhem”i çalışdırması ilə tanınan Postekoğlu “mahmızlar”dan yayda ayrılıb. 2023-cü ilin iyunundan “Tottenhem”i çalışdıran yunan mütəxəssis ötən mövsüm bu komandanı Avropa Liqasının qalibi edib.

Bəs portuqaliyalı mütəxəssis niyə “Nottengem”dən ayrıldı? Nunu Eşpiritu Santu ilə vidalaşmaq qərarı çoxları üçün gözlənilməz oldu. Hələ yayda klub onunla 2028-ci ilə qədər müqavilə imzalamışdı – axı portuqaliyalı son 30 ildə ilk dəfə “Forest”i avrokuboklara çıxarmışdı, premyer-liqada üç dəfə ayın məşqçisi sayılmışdı.

Ancaq yeni mövsümdə işlər baş-ayaq getdi. Artıq avqustda bukmeker kontorları Nununu istefaya göndərilməyə əsas namizəd sayırdı, baş məşqçi özü isə klubun sahibi Yevangelos Marinakislə münaqişə aparırdı. Bir müddət əvvəl “Sky Sports”a müsahibə verən Nunu klubun transfer siyasətini tənqid etmişdi. Bu müsahibə “Nottingem”in düşərgəsində şok effekti doğurdu, fikir ayrılıqlarını bir qədər də dərinləşdirdi. Hətta 4 futbolçuya görə 118 milyon funt ödənilməsi də vəziyyəti qaydasına salmadı. Rəhbərlik düşündü ki, baş məşqçi bilərəkdən vəziyyəti gərginləşdirmək yolunu tutub. Təbii ki, belədə istefa qaçılmaz idi.

İndi iə Postekoğlunun personasına nəzər salaq. “Forest” üçün Postekoğlu qeyri-adi fiqurdu. Yunanıstanda dünyaya gəlsə də, 1970-ci ildə ailəsi ilə birgə Avstraliyaya köçən Postekoğlu məhz burda böyüyüb, boya-başa çatıb, 2013-17 aralığında bu ölkənin yığmasını çalışdırıb, Avropada məşhurluq qazanması ilə Şotlandiya çempionu etdiyi “Seltik”in adı ilə bağlıdı.

Bir qədər əvvəl vurğuladığımız kimi, Postekoğlu 2023-ün iyunundan bu ilin yayına qədər “Tottenhem”i çalışdırıb. Premyer-liqadakı nəticələri birmənalı qiymətləndirmək çətindi. “Mahmızlar” 2024/25 mövsümünü 17-ci yerdə bitirsələr də, Avropa Liqasının finalında “Mançester Yunayted”i məğlub etməyi (1:0) bacardılar. İndi isə mütəxəssis yeni çağırışla üzləşib – “Forest”i premyer-liqada sabit səviyyəyə qaldırmalı və avrokuboklarda yaxşı çıxış etməlidi.