"Football-plus.az" xəbər verir ki, “Lids”lə ev oyunu “Arsenal” üçün çətin keçdi. By komanda, adətən, “topçular” üçün münasib rəqib sayılır, ancaq bu dəfə londonlular yalnız son 30 dəqiqədə üstünlüyünü göstərdi. Artetanın komandası fasiləyə qədər irəlidə elə bir təhlükə yarada bilmədi. “Lids” isə üç dəfə hesabı açmağa yaxın oldu – Okafor “çərçivə”yə düşmədi, Ampadu ilə Qudmundssonun zərbələrindən sonra Rayya komandasını xilas etdi. Qonaqlar 2-ci hissənin əvvəlində qol istəyinə çatdı. Və bu qol oyunun məntiqi axarına uyğun idi – yorkşirlilər əməlli-başlı təzyiq göstərirdi. Ancaq “Arsenal” qısa zaman kəsiyində oyunun axarını dəyişə bildi. Cəmi 7 dəqiqə sonra Kalafyori hesabı bərabərləşdirdi. Arteta oyuna yeni güc qatdı və dəyişikliklərdən biri işə yaradı – Gimarayns meydan sahiblərini irəli çıxardı. “Topçular”ın qolları cəmi 8 dəqiqəyə sığdı, qonaqlar artıq özünə gələ bilmədi. “Arsenal”ın fərqi artırmaq imkanları da oldu. Əzmkar qələbə qazanan çempion “Brayton”la oyundakı fiaskoya görə “günahını yudu”. “Lids” isə cari mövsümdə ilk dəfə uduzdu. Hərçənd qonaqlar fasiləyə qədər olan qol imkanlarından yararlansaydı, “Emireyts”dən ən azı 1 xall ayrılacaqdı.
Mövsümün əvvəlində çox qol buraxan “Çelsi” beynəlxalq fasilədən sonra inadkar “Bornmut”u qəbul etdi. Londonlular erkən qol vurdu: cərimə meydançasına daxil olan Palmer Hendersona ötürmə verdi, o isə uzaq küncü dəqiq “nişan aldı”. Cəmi bir dəqiqə sonra “Çelsi” 2-ci qolu da vurdu. Hendersondan ötürmə alan Rocers fərqi artırdı. Tədricən özünə gələn “albalılar” ilk yarının sonunda real qol vəziyyəti yaratdı: qapı önünə çıxan Rayan təkbətək dueldə Martineslə bacarmadı, argentinalı qapıçı Kristinin təkrar zərbəsini də qaytardı. 2-ci hissənin əvvəlində fərq artdı – Pedro topu tirin altına göndərdi. “Bornmut” dərhal fərqi azaltsa da, bu qol “zadəganlar”ı bir qədər də qıcıqlandırdı. Əvvəlcə Pedro üç top fərqini bərpa etdi, sona 20 dəqiqə qalmış isə Henderson 5-ci qolu da vurdu. Beləcə “Çelsi” inamlı qələbə qazanmaqla turnir cədvəlini xeyli yaxşılaşdırdı.
Mövsümün əvvəlində problem yaşayan “Mançester Yunayted” evdə autsayder “Tottenhem”lə qarşılaşdı. “Mahmızlar” startda az qala Lammensin səhvindən yararlanacaqdı, ancaq belçikalı qapıçı Solankenin zərbəsini qaytarmaqla səhvini düzəltdi. Topa nəzarət baxımından önəmli üstünlüyə yiyələnən londonlular daha bir təhlükəli vəziyyət yaratdı: sol cinahdan qurulan gözəl hücum Kudusun topu qapıdan azca aralı vurmasıyla nəticələndi. Fasilədən sonra Savinyo iki dəfə ön plana çıxdı: o, əvvəlcə iti bucaq altından topu qapıya göndərdi, ancaq qapıçını “sığortalayan” Şou qola imkan vermədi. Ardından Savinyonun asmasını qəbul edən Solanke topu qapının üstündən vurdu. “Tottenhem” təhlükəli hücumlar qursa da, MY fərqləndi. 73-cü dəqiqədə Mbemo uzaq küncə qarşısıalınmaz zərbə endirdi. 5 dəqiqə sonra “mahmızlar” azlıqda qaldı – Şou ilə mübahisəyə girişən Bentankur birbaşa qırmızı vərəqə ilə qovuldu. Amma azlıqda qalan “Tottenhem” uzatma dəqiqələrində məğlubiyyətdən qaça bildi – Tonalinin asmasını tamamlayan Solanke komandasına xal qazandırdı.
Turun mərkəzi oyununda “Liverpul”la “Mançester Siti” qarşılaşdı. Bütün əsas hadisələr 2-ci hissədə baş verdi. İlk yarıda meydanda dinamik, ancaq qol vəziyyətləri ilə zəngin olmayan mübarizə getdi. Qonaqlar bir qədər üstün görünsə də, rəqib qapısı önündə təhlükəli vəziyyət yaratmaqda çətinlik çəkirdi. Fasilədən sonra oyun “açıldı”, qol vəziyyətlərinin sayı artdı. Belədə hadisələrin axarı istənilən tərəfin xeyrinə dəyişə bilərdi. 56-cı dəqiqədə Dokyunun meydana çıxması hər şeyi dəyişdi. Belçikalı ulduz əvvəlcə Qravenberxin qovulmasına səbəbkar oldu. Ardından iki sürətli qol təşkil etdi, nəhayət, 3-cü qolun vurulduğu hücuma da başladı. Qonaqlar say üstünlüyündən ustalıqla yararlandı. İlk 6 oyunda 6 qələbə və “Arsenal”la 3 xal fərqi – “Siti”nin nəticəsi heyranlıq doğurur.
Turun qalan oyunlarına gəlincə, “Aston Villa” ilə “Brentford”, “Hall Siti” ilə “Everton” məhsuldar heç-heçəyə razılaşdı. “İpsviç” “Fulhem”i, “Brayton” “Sanderlend”i, “Kristal Pelas” “Nottingem Forest”i məğlub etdi. Dünən axşam keçirilən son oyunda “Koventri” “Nyukasl”dan üstün oldu.
6-ci tur
Arsenal – Lids 2:1
Kalafyori, 62. Gimarayns, 70 – Castin, 55. (603125)
Arsenal: Rayya, Uayt (Timber, 63), Konsa, Qabriel, Kalafyori (İnkapye, 82), Rays, Lüis-Skelli (Gimarayns, 63), Saka, Edeqor (Merino, 90+1), Madueke, Haverts (Dyökereş, 63).
Çelsi – Bornmut 5:1
Henderson, 2; 70. Rocers, 3. Pedro, 46; 67 – Evanilson, 51. (39676)
Çelsi: Martines, Açimponq, Lakrua, Koluill, Neto (Uelbek, 83), Henderson, Kaysedo (Lavia, 72), Çavarriya, Palmer (Hüsto, 88), Pedro (Palestra, 72), Rocers (Estevao, 83).
Mançester Yunayted – Tottenhem 1:1
Mbemo, 73 – Solanke, 90+2. (74129)
MY: Lammens, Yoro (Dalot, 59), Maquayr, Martines, Şou (Heven, 90+5), Tilemans (Baleba, 59), Maynu, Diallo (Zirkzee, 59), Fernandeş, Mbemo, Kunya (Reşford, 90+5).
Liverpul – Mançester Siti 0:3
Holann, 65. Dokyu, 68. Şerki, 78. (60338)
Liverpul: Alisson, Arauxo (Frimponq, 75), Jake (Qomes, 88), Van Diyk, Kerkez, Qravenberx, Makallister, Barkolya (Kyeza, 88), Virts (Nyoni, 66), Munyos, Kumas (Nqumoa, 75).
MS: Donnarumma, Nunyeş, Diaş, Qehi, O’Rayli (Qvardiol, 66), Anderson, Fernandes (Buaddi, 80), Semenyo, Şerki, Ndiay (Dokyu, 56), Holann (Allan, 80).
Aston Villa – Brentford 2:2
Cekson, 12. Makqinn, 77 – Yarmolyuk, 10. Ayer, 79. (36636)
Hall Siti – Everton 2:2
Gelhardt, 48. Bellumi, 74 – Dyusberi-Holl, 55. Barri, 68. (24458)
İpsviç – Fulhem 2:1
Uattara, 88. O’Şi, 90+2 – Sessenyon, 55. (29445)
Sanderlend – Brayton 0:2
De Keyper, 53. Acam, 90+3. (47196)
Kristal Pelas – Nottingem Forest 3:1
Kamada, 41. Lerma, 45+4. Pino, 59 – Ndoy, 3. (25120)
Koventri – Nyukasl 4:1
Rudoni, 6-p. Şerif, 48. Simms, 81. Mfuni, 86 – Botman, 70. (30811)
1. Mançester Siti 6 6 0 0 16-5 18
2. Arsenal 6 5 0 1 10-5 15
3. Brayton 6 4 1 1 18-5 13
4. Brentford 6 2 4 0 12-6 10
5. Everton 6 2 4 0 8-5 10
6. Çelsi 6 3 1 2 15-13 10
7. Lids 6 2 3 1 8-5 9
8. Hall Siti 6 2 3 1 8-6 9
9. Liverpul 6 2 3 1 7-7 9
10. İpsviç 6 3 0 3 9-12 9
11. Nyukasl 6 2 2 2 10-12 8
12. Kristal Pelas 6 2 1 3 9-12 7
13. Mançester Yunayted 6 1 3 2 9-9 6
14. Koventri 6 2 0 4 5-11 6
15. Nottingem Forest 6 1 2 3 5-8 5
16. Aston Villa 6 1 2 3 6-11 5
17. Sanderlend 6 1 1 4 6-12 4
18. Bornmut 6 0 3 3 7-13 3
19. Tottenhem 6 0 3 3 3-9 3
20. Fulhem 6 0 2 4 6-10 2
Bombardirlər: Holann (MS) – 6, Pedro (Çelsi) – 5.
Növbəti turun oyunları oktyabrın 17-19-u aralığında keçiriləcək: Everton – Çelsi, Brentford – Liverpul, Mançester Siti – İpsviç, Fulhem – Hall Siti, Nyukasl – Aston Villa, Bornmut – Sanderlend, Brayton – Kristal Pelas, Lids – Mançester Yunayted, Nottingem Forest – Arsenal, Tottenhem – Koventri.
Oyundan sonra
Mikel Arteta, “Arsenal”ın baş məşqçisi:
“Bizi çox çətin oyunun gözlədiyini bilirdik. Üçhəftəlik fasilədən sonra qayıtdıq. Bu müddətdə 16 oyunçu düşərgədə yox idi. Həmçinin fasilə ərəfəsində ağır məğlubiyyətlə üzləşmişdik, rahatlıq tapa bilmirdik. İki hədəfimiz var idi. Birincisi, çağırışı qəbul etməliydik. Bu mövsüm uduzmayan və yüksək yeri haqq edən komanda ilə qarşılaşırdıq. İkincisi, nəyisə sübut etməliydik. Çox yaxşı başladıq, oyunun axarına tam nəzarət edir, ancaq imkanlardan yararlana bilmirdik. Bu rəqibə qapımıza yol tapmaq üçün çox imkan lazım deyil. Top hər dəfə cərimə meydançasında olanda “Lids” çox təhlükəli olur. Nəticədə hesabda geri düşdük. Ancaq sonra hadisələrin axarını dəyişə bildik. Yenidən komandamıza xas olan qələbə aclığı, xarakter və cəsarət baş qaldırdı. Biz hesabı bərabərləşdirəndən sonra oyunun enerjisi dəyişdi. Sonradan meydana çıxan futbolçular oyunun axarına ciddi təsir göstərdi, qələbə qazanmağımıza yardım etdi. Bizim xarakterimiz məhz belədi. Hər həftə eyni şeylə üzləşəcəyimizi bilirik. Son iki həftədə liqada yaşananları daha aydın təsəvvür etmək üçün çoxlu oyuna baxdım. Bundan sonra da asan olmayacaq”.
Entso Mareska, “Mançester Siti”nin baş məşqçisi:
“İlk yarıda bizə çətin idi. Topa yiyələnsək də, o qədər də effektli deyildik. İkinci hissə ərəfəsində bəzi dəyişikliklər etdik və daha yaxşı oynamağa başladıq. Meydandan kənarda başverənlər komandaya təsir edə bilərmi? Bəlkə də hə, bəlkə də yox. Bilmirəm. Bu məqam komandanı azarkeşlərlə bütünləşdirə bilər. Həftənin ortasında futbolçulara dedim ki, ehtirasını göstərin, onda qələbə bizim olacaq. Biz yalnız öz işimizə, oyunlara köklənmişik”.
Faktlar
* “Mançester Yunayted” premyer-liqada son 40 ildəki ən pis startını reallaşdırdı. 6 turdan sonra cəmi 6 xalı olan komanda 13-cü pillədə qərarlaşıb. Mançester təmsilçisi sonuncu dəfə 6 turdan sonra bundan da az xalı 1986/87 mövsümündə toplayıb. Onda komandanın cəmi 4 xalı var idi.
* “Çelsi”nın premyer-liqanın cari mövsümündə vurduğu 12 qoldan 6-sı ilk 10 dəqiqəyə təsadüf edib.
Turun rəqəmi
4 – Mareska premyer-liqanın tarixinə düşdü. O, yeni komandasının “sükanı arxasında” ilk 6 oyunun hamısında qələbə qazanan 4-cü mütəxəssisdi. Əvvəllər bunu Karlo Ançelotti “Çelsi”, Xosep Qvardiola “Mançester Siti”, Ule-Qunnar Sulşer “Mançester Yunayted” ilə bacarmışdı.
Turun ulduzu
Jeremi Dokyu (MS) – cəmi 34 dəqiqə oynayan futbolçunu turun ulduzu seçmək mübahisəli görünə bilər. Ancaq belçikalı hücumçu turun mərkəzi oyununun taleyini həll etdi. Qravenberxi “qovdurması” öz yerində, həm qol vurdu, həm də qalan iki qolda yaxından iştirak etdi.
Turun sitatı
Andoni İraola, “Liverpul”un baş məşqçisi:
“Düşünürəm ki, bu oyunun təhlili çətin deyil. Faktiki iki fərqli oyun keçirdik. Mən qırmızı vərəqəyə qədər və ondan sonra olan oyunu nəzərdə tuturam. İlk 62 dəqiqədə biz daha yaxşı oynadıq. “Qırmızı”dan sonra rəqib daha güclü idi və qollarını vurdu. Ancaq bu gün oyunçularım tərifi haqq edir, çünki bütün güclərini meydanda qoydular. Azarkeşlər də möhtəşəm idi – oyuna qədər, oyunun gedişində və oyundan sonra”.
