''Fənərbaxça'' üçün avrokubok həftəsi hər baxımdan uğursuz alındı.

"Football-plus.az" xəbər verir ki, Avropa Liqasının pley-offunda ''Nottingem Forest''i qəbul edən İstanbul nəhəngi həm 0:3 uduzaraq mərhələ adlamaq şansını möcüzəyə buraxdı, həm də öz kapitanı Milan Şkrinyarı itirdi. Müdafiənin dirəyi hesab olunan təcrübəli slovakiyalı futbolçu 23-cü dəqiqədə zədələnərək oyuna davam edə bilmədi və yerini Çağlar Söyüncüyə verdi. Stadionu axsayaraq tərk edən Şkrinyarın durumu ciddi görünür. Bunu oyundan sonra baş məşqçi Domeniko Tedesko da dilə gətirdi.

Jurnalist Sərcan Həmzəoğlunun paylaşdığı xəbərə görə klubun tibbi personalı sağ ayaq əzələsini dartan Şkrinyarın 4 həftə oynaya bilməyəcəyini məşqçilər korpusuna bildirib. Ancaq onun dəqiq durumuna bu günkü ətraflı tibbi müayinədən sonra aydınlıq gələcək.

İlkin ehtimallar doğrudusa, Şkrinyar həm ingilislərə qarşı cavab oyununu, eləcə də superliqada ''Kasımpaşa'', ''Antalyaspor'', ''Samsunspor'', ''Fatih Karagümrük'' və ''Qaziantep''lə oyunları buraxmalı olacaq.

31 yaşlı futbolçu bu mövsüm 34 rəsmi oyunda iştirak edərək aktivinə 2 qol, 1 məhsuldar ötürmə yazıb.