Türkiyə çempionatının son turunda evdə debütant ''Samsunspor''u yenə bilməyən ''Fənərbaxça'' bu qarşılaşmada təkcə önəmli xallar yox, həm də vacib futbolçusunu itirib.

“Football-plus.az” xəbər verir ki, görüşün son anlarında zədə alaraq Kruniç ilə əvəzlənən Fredin tibbi müayinəsinin cavabı bəlli olub. Təcrübəli braziliyalı yarımmüdafiəçinin sağ ayaq əzələsində yırtıq aşkarlanıb. İlkin ehtimallara görə 30 yaşlı futbolçu 4-6 həftə komandasına kömək edə bilməyəcək! Fred superliqada ''İstanbul BŞ'', ''Ankaragücü'', ''Antalyaspor'', ''Alanyaspor'', ''Çaykur Rizəspor'', eləcə də kubokda ''Qaziantep''ə qarşı oyunları buraxmalı olacaq. ''Fənər''in ötən yay 9,7 milyon avroya ''Mançester Yunayted''dən transfer etdiyi ''sambaçı'' bu mövsüm 21 rəsmi oyuna çıxaraq 6 məhsuldar ötürmə ilə yadda qalıb. Komandanın bu mövsüm Fredsiz oynamaq məcburiyyətində qaldığı matçlarda çətinlik çəkməsi diqqət çəkir. İstanbul nəhəngi superliqada Fredin olmadığı 5 matçın 3-də xal itiribsə, Konfrans Liqasında onsuz hər iki görüşdə məğlub olub.

ƏLİ