"İmişli" Misli premyer-liqasının 20-ci turunda "Qarabağ"a 0:1 hesabı ilə uduzdu.

"Football-plus.az" xəbər verir ki, meydan sahiblərinin baş məşqçisi Jorj Kaşkilya matçdan sonra keçirilən mətbuat konfransında jurnalistlərin suallarını cavablandırıb:

- Çox çətin və mübarizəli oyun getdi. Hər iki komanda qələbə qazanmaq istəyirdi. Komandam bu gün taktiki cəhətdən yaxşı oyun göstərdi. "Qarabağ"ın hücum xəttinin qarşısını ala bilirdik. İkinci hissədə standart vəziyyətdə bir səhv qolla nəticələndi. Bu da qələbə qolu oldu. Komandamın oyunundan razı qaldım. "İmişli" yaxşı oynadı, sona qədər mübarizə apardı. Məğlubiyyət futbolun bir hissəsidi. Heç-heçə daha ədalətli nəticə olardı.

- Demək olar ki, stadionda hamı "Qarabağ"a azarkeşlik edirdi. Evdə belə atmosferdə oynamaq necədi?
- Elə də böyük mənfi təsiri yox idi. İlk dəfədi ev oyunumuza bu qədər azarkeş gəlir. Onların "Qarabağ"ı dəstəkləməsi bizim oyunçulara motivasiya verirdi. Bizə heç bir problem yaratmadı.

- Dioqo Almeydanın lazımsız qırmızı vərəqə almasını necə şərh edərdiz?
- Oyundan sonra epizodu təhlil edəcəyik. Almeyda barədə tədbir görüləcək.

- Qurban Qurbanov meydança barədə mənfi fikirlər səsləndirdi. Ot örtüyünün yaxşılaşdırılması üçün hansısa tədbirlər görüləcək?
- Meydançanın vəziyyətinə baş məşqçi cavabdeh deyil. Bu sual rəhbərliyə verilsə, daha yaxşı olar.

- Futbolçular meydançanın durumundan şikayət etmirlər?
- Qurban Qurbanov kimi məşqçi burda sadəcə bir oyun keçirəndən sonra belə narazılıq edibsə, bizim futbolçular razı qalarlar? Burada 16-17 oyun keçirməliyik. Əlbəttə, meydaçanın təsiri böyükdü. Ötən oyunda Yau Mozes, bu gün Mehdi Tahirov zədələndi. Futbolçular da meydançanın təsirini hiss edirl. Burda oynamağımız nə məndən, nə də oyunçulardan asılıdı. Əlimizdən gələni etməliyik.