Qış Olimpiadasına görə MHL-in müntəzəm çempionatında uzunmüddətli fasilə yaranıb.

"Football-plus.az" xəbər verir ki, fasilə ərəfəsindəki son oyunlar fevralın 6-da keçirildi və bəzi maraqlı məqamlarla müşayiət olundu.

“Los-Anceles”in hücumçusu Anje Kopitar MHL-də 1300 xal həddinə çatdı. O, komandasının “Veqas”a 1:4 uduzduğu oyunda məhsuldar ötürmə ilə yadda qaldı. 38 yaşlı sloveniyalı fəaliyyətdə olan hokkeyçilər arasında 1300 xal həddinə çatan 5-ci oyunçudu. Kopitar yalnız Sidni Krosbi (1746), Aleksandr Oveçkin (1671), Yevgeni Malkin (1390) və Patrik Keyndən (1375) geri qalır. 2006-cı ildən “Los-Anceles”in şərəfini qoruyan sloveniyalı MHL-də sonuncu mövsümünü keçirir.

Bəlkə 2025/26 Aleksandr Oveçkin üçün də sonuncu mövsümdü. Amma hələlik “Vaşinqton”un rusiyalı ulduzu xal ehtiyatını artırmaqdadı. 40 yaşlı Oveçkin “Neşvill” ilə qarşılaşmada buz üzərinə çıxmaqla müntəzəm çempionatlarda 1550-ci oyununu keçirdi. O, bu göstəricidə 17-ci pilləyə yüksəldi. 16-cı yerdə “Kolorado”nun 1985 oyun keçirən müdafiəçisi Brent Berns qərarlaşıb. Oveçkin indiyə qədər müntəzəm çempionatlarda 919 qol vurub, 752 məhsuldar ötürmə verib. Oyun sayında MHL rekordçusu isə Patrik Marlodu (1779).

Yeri gəlmişkən, Olimpiadaya görə yaranan fasilədə Dubaya baş çəkən Oveçkin xoş sürprizlə üzləşib. Yerli restoranların birində ulduz hokkeyçiyə baş aşpazın adından xüsusi tort təqdim olunub. Üzərində “1000-ci qol yolunda” yazılan tortun şəklini sosial şəbəkədə Oveçkinin xanımı yayıb.

Xatırladaq ki, 40 yaşlı Oveçkin indiyə qədər pley-off da nəzərə alınmaqla 996 qol vurub. O, Ueyn Qretskinin rekordunu təkrarlamaq üçün daha 20 dəfə fərqlənməlidi.

6 fevral
Baffalo – Pittsburq 2:5 (1:2, 0:1, 1:2)
Vaşinqton – Neşvill 4:2 (2:0, 1:1, 1:1)
Nyu-Cersi – Aylenders 1:3 (0:0, 1:1, 0:2)
Reyncers – Karolina 0:2 (0:1, 0:0, 0:1)
Filadelfiya – Ottava 1:2 OT (0:0, 0:1, 1:0, 0:1)
Tampa-Bey – Florida 6:1 (2:0, 2:0, 2:1
Veqas – Los-Anceles 4:1 (4:1, 0:0, 0:0)