Qış transfer dönəmini o qədər də fəal və uğurlu keçirməyən “Qalatasaray”dan yeni xəbərlər var.

"Football-plus.az" xəbər verir ki, daha öncə Noa Lanqla Yaser Aspilyanı icarə əsasında heyətinə qatan İstanbul nəhəngi növbəti keçidləri rəsmiləşdirib. Amma öncə İstanbul nəhənginin Yusuf Dəmirdən qurtulduğunu qeyd edək.

2022-ci ildən “sarı-qırmızılar”a məxsus olan, amma kluba heç bir faydası dəyməyən, bu müddət ərzində cəmi 26 rəsmi oyuna çıxan 22 yaşlı vinger sabiq klubu “Rapid”ə dönüb. Avstriyada doğulan türkəsilli vinger məhz elə vyanalıların yetirməsidi. “Qalatasaray” 4 il öncə 6 milyon avroya aldığı futbolçunu havayı əldən buraxmağa razı oldu!

Yeni transferlərə gəlincə, Türkiyə çempionu srağagün Renato Nyaqanın keçidini tamamlayıb. Özü də 6,5 milyon avroya. Portuqaliyanın ortabab klubu “Kaza Pia”dan alınan 18 yaşlı mərkəz yarımmüdafiəçisi ilə 4,5 illik müqavilə imzalanıb. Bu futbolçunun yarım mövsümlük maaşı 375 min avro təşkil edəcək. Sonrakı mövsümlərdə isə o, illik 750, 800 və 850 min avro qazanacaq. Nyaqa Qvineya-Bisaudan olan ilk futbolçu kimi klub tarixinə düşüb!

2007-ci il təvəllüdlü futbolçu fiziki göstəriciləri və təkbətək mübarizələrdəki uğurlu oyunu ilə diqqəti çəkir. O, orta hesabla hər oyunda 9,29 ikili mübarizədən qalib ayrılır və bu, Avropanın 10 aparıcı çempionatında 21 yaşa qədər olan futbolçular arasında ən yaxşı göstəricidi.

Dünən “Qalatasaray” daha bir gənc oyunçunun transferini bitirdi. Söhbət Can Armando Günerdən gedir.

Xatırlayırsızsa, Münhenqladbax “Borussiya”sının yetirməsi olan 18 yaşlı vinger hələ yanvarın 9-da İstanbula gəlmiş və tibbi müayinədən keçmişdi. Amma sonradan məlum olmuşdu ki, hələ almanlarla razılıq əldə olunmayıb. “Borussiya” rəhbərliyi istanbulluları FİFA ilə hədələyincə, qürbətçi futbolçu kor-peşman Almaniyaya dönməli olmuşdu. Həmin vaxtdan bəri “Borussiya” ilə danışıqları davam etdirən “Qalatasaray” bütün məsələlərdə anlaşma əldə edib. Almanlar 750 min avro tələb etsə də, bu transfer 300 min avroya tamamlanıb. Sonrakı satışdan da almanlara heç bir pay verilməyəcək. “Borussiya”ya yalnız 100 min avro həcmində bonuslar veriləcək.

Türkiyə mətbuatına inansaq, Can Armando Güner ilə 4,5 illik müqavilə imzalanacaq.

“Qalatasaray”ın son sürprizi isə Saşa Boedi. “Bavariya” ilə danışıqlarda istəyinə çatan “sarı-qırmızılar” sabiq futbolçusunu geri qaytarmağa müvəffəq olub.

Fransalı müdafiəçi dünən İstanbula gələrək tibbi müayinədən keçib. “Qalatasaray” yarım mövsümlük icarə haqqı kimi Münhen nəhənginə 500 min avro ödəyəcək. İstanbullular yayda bu oyunçunu daimi əsasda transfer etmək istəsələr, daha 15 milyon avro ödəməli olacaqlar.

Xatırladaq ki, “Qalatasaray” iki il öncə - 2024-ün yanvarında bu futbolçunu 30 milyon avroya “Bavariya”ya satmışdı. 25 yaşlı sağ cinah müdafiəçisi bu iki il ərzində Almaniya futbolunun flaqmanında heç cür əsas heyət üzvünə çevrilə bilmədi. “Rekodmayster”lə 2028-ə qədər müqaviləsi olan Boe bu mövsüm 15 rəsmi oyunda hesabına bir məhsuldar ötürmə yaza bilib.