Şamaxıda Qurban Qurbanova yaxşı təklif aldığını deyən futbolçu kim imiş? – adı “Futbol+”də!
“Qarabağ”ın baş məşqçisi Qurban Qurbanov “Şamaxı” ilə matçdan sonra keçirilən mətbuat konfransında maraqlı fikirlər səsləndirdi. Nəriman Axundzadənin ABŞ klubuna – “Kolambus Kryu”ya transferini dəyərləndirən mütəxəssis Bəhlul Mustafayevin qalmasından, komandanı gözləyən sıx qrafikdən də danışdı.
Qurban bəyin diqqətçəkən açıqlamalarından biri də belə oldu:
“Bu gün də oyundan sonra bir futbolçu mənə yaxınlaşıb dedi ki, yaxşı təklifim var. Bunları əldə saxlamaq heç də asan deyil. Sakitləşdirməyə çalışırıq, başqa xəbərlər gəlir”.
Görəsən, Qurban bəy kimi nəzərdə tuturdu?
“Football-plus.az”ın əldə etdiyi məlumata görə, söhbət Leandro Andradedən gedir. Onun hansı klubdan təklif aldığı hələ bəlli olmasa da, sözün əsl mənasında yüksək qazanc vədiylə üz-üzədi. Kabo-Verdedən olan futbolçunun son matçlarda istəsksiz görünməsi, performansının aşağı səviyyədə olması da şirnikləndirici transfer təklifi ilə bağlıdı. İş o həddə çatıb ki, Qurban Qurbanov ad çəkməsə də, onun çıxışlarından narazı qaldığını ictimaiyyət önündə açıqlamağa məcbur oldu.
Maraqlıdı, Andrade də Bəhlul kimi komandada qalmağa qərar verəcək, yoxsa Nərimandan sonra onunla da yollar ayrılacaq? Bu suala ancaq zaman cavab verə bilər.
Xatırladaq ki, Leandronun “Qarabağ”la müqaviləsinin müddəti 2027-ci ilin yayında başa çatacaq. “Transfermarkt”a görə, futbolçunun dəyəri 3 milyon avrodu.
KƏNAN BAHADIR
Digər xəbərlər
