“Əvvəla bunu vurğulayım: hələ heç yerdə görməmişəm ki, tərəflərdən biri rəsmi təklif olduğunu açıqlasın (Qurban Qurbanov “Zirə” ilə yoxlama oyunundan sonra deyib – red.). Mətbuatda bu barədə xəbərlər necə tirajlanır, başa düşmürəm. Hətta görürəm ki, oyunçunun transfer qiymətini də yazırlar. “Transfermarkt”ı, ümumiyyətlə, kənara qoymaq lazımdı. Çünki orda Avropada oynayan futbolçular yüksək dəyərləndirilir. İki klub razılaşacaqsa, bir futbolçunun taleyi həll olunacaqsa, “transfermarkt”a əsaslanıb danışmaq absurddu. “Braqa” məsələsinə gəlincə, onu deyə bilərəm ki, Qurban Qurbanov növbəti mərhələyə adlamaq üçün əlindən gələni edəcək - istər Leandro heyətdə olsun, istər olmasın. Amma düşünmürəm ki, “Qarabağ”ın “Braqa”nı keçmək şansı hansısa oyunçudan asılıdı. Doğrusu, bunlar bir-biriylə əlaqəli məsələdi. Lakin ən sonda qərar verəcək şəxslər bütün ehtimalları nəzərə alacaqlar. Gördüyünüz kimi, neçə müddətdi bu təklif var, ancaq Leandro hələ də satılmayıb. Artıq onun satılacağını da düşünmürəm. Satılacağı təqdirdə belə əvəzedilməz oyunçu yoxdu. Çünki Kadi Borges, İbrahima Vaci gedəndə də deyirdilər ki, “Qarabağ” zəifləyəcək, amma belə olmadı. Qurban Qurbanov qısa müddətdə boşluğu doldura biləcəyini düşünsəydi, onda Leandronu rahat şəkildə satardı. Lakin bu gün görürük ki, “qış pəncərəsidi”, oyunçu tapmaq çətinliyi, onun dərhal komandaya uyğunlaşmaq məsələsi var. Buna görə də transfer məsələləri çox uzanır”.