Aydın məsələdi ki, ideal formada olan “Liverpul” nəinki “Qarabağ”, hətta “Barselona” üçün də təhlükəli rəqibdi. Amma bəxtimiz onda gətirib ki, bu gün Mersisayd klubu ənənəvi oyun standartlarından çox uzaqdı.

Söhbət statistikadan getmir; rəqəmlərin sehirli dünyasına baş vursaq, görərik ki, şənbə günü “Bornmut” “Liverpul”un 13 oyunluq məğlubiyyətsiz seriyasın son qoydu. Yetərincə uzun seriyadı. Bu başqa məsələ ki, Arne Slotun çalışdırdığı komanda yanvarda yalnız iki oyunda qalib gəlib – ÇL-də “Marsel”i (3:0), ölkə kubokunda “Barnsli”ni (4:1) məğlub ediblər.

Gəlin məsələyə başqa yöndən danışaq: axı “Liverpul”un dərdi nədi, ulduzlarla zəngin heyətə malik komanda indiyə niyə gözümüzə belə əzik-üzün, miskin görünür? Hətta o dərəcədə ki, “Enfild”dən nəinki 1, 3 xal ilə dönməyin xəyallarını qururuq?

“Bornmut”la oyun böhranı bütün çılpaqlığıyla göstərdi. "Liverpul" zəifdi və rəqibləri bunu yalnız hiss etmir, həm də bundan yararlanırlar.

* Artıq 5-ci dəfə komanda son dəqiqələrdə qol buraxdı – premyer-liqada bundan pis nəticəyə yalnız “Nyukasl” ilə “Lids” malikdi. Özü də maraqlıdı ki, bütün son dəqiqə qolları “Liverpul”a xal bahasına başa gəlib. Halbuki çempionat Slotun komandası üçün tam fərqli başlamışdı – “qırmızılar” məhz sonda vurulan qollar hesabına ardıcıl 4 qələbə qazanmışdı.

* Futbolçular meydanda çaşqın görünürlər. Mersisaydlılar topa nəzarət baxımından (ortalama 61,8 faiz) premyer-liqada liderdi, zərbə sayına görə ilk iki komandadan biridi, ancaq hədsiz aşağı dəqiqlik bütün bu üstünlükləri heçə endirir: zərbələrin yalnız 27,9 faizi “çərçivə”yə gedir.

* Komanda standart vəziyyətlərdə zəifdi. Qolların 9-u məhz cərimə və künc zərbələrindən sonra buraxılıb.

* Liderlər qətiyyən formada deyil. Vircil van Diyk hədsiz çox məhsuldar səhvə yol verir, Məhəmməd Salah gələcəyi ilə bağlı sualların əlində əsir-yesirdi, adətən, inamlı görünən qapıçı Alisson ən pis mövsümlərindən birini keçirir – qapıya gələn zərbələrin yalnız 62 faizini dəf edib. Van Diykin passiv oyunu komandanın hücum əməliyyatlarına da birbaşa təsir göstərir.

Bütün sadaladığım çatışmazlıqlar fonunda “Liverpul”un mümkün çempionluğundan söhbət gedə bilməz. Odu ki, “qırmızılar” ümidini əsasən Çempionlar Liqasına bağlayıb. Və belə miskin vəziyyətdə olan komanda sabah “Qarabağ” önünə çıxacaq. Yüzdəyüz əminəm ki, Azərbaycanın indiki və gələcək çempionları bir də heç vaxt belə zəif “Liverpul”la qarşılaşmayacaq.

ORXAN