Misli premyer-liqasının 17-ci turinda “Neftçi” evdə “Zirə” ilə heç-heçə etdi - 0:0. “Football-plus.az” “ağ-qaralar”ın baş məşqçisi Yuri Vernidubun oyunsonrası mətbuat konfransından hesabatı təqdim edir.

- İki fərqli hissə oldu. Varqas meydana çıxandan sonra fəallıq artdı.

- Varqasın əvvəldən meydanda olmaması fiziki hazırlığına görədi, yoxsa taktiki gediş idi?

- İlk hissə uğurlu oldu. Təlim-məşq toplanışında nəticə önəmli olmur. Burdakı məqsəd fərqli və çətindi. Hər oyun xal qazanmalıyıq. Xeyli yuxarı qalxmaq istəyirik. İkinci hissədə dəyişiklik etdik. İlk hissədə iki dayaq yarımmüdafiəçisi var idi, ikinci yarıda ancaq Metyunu saxladıq. Eminlə Varqas da irəlidə oldu. Oyunçularım nəticədən məyus oldu. Qarşıda 16 oyun var. İşimiz çoxdu.

- Elvin Bədəlov irəli çox çıxırdı. Bu sizin təlimatınızdı?

- Bizdə belə qayda var: müdafiəçi topu qəbul edib, hərəkət etməlidi. Topla hərəkət vacibdi.

- Demək olar ki, özünüz üçün heyət formalaşdırmısız? Qış toplanışında daha çox Emil Balayev qapıda idi. İndi isə Kenan Piriçə şans verdiz.

- Toplanış toplanışdı, həmin vaxt futbolçularla tanış olurduq. Sonuncu oyunda isə bugünkü heyət oynamışdı. Ona görə də həmin heyəti seçmək qərarı verdik. Nəzərə alaq ki, 22 futboçu var, hamı oynamaq istəyir. Əlimdən gələni edəcəm ki, hamı oynasın. Qapıçı məşqçimiz "Beşiktaş"da işləyib. Ona tam etibar edirəm. Toplanışda gördüm ki, o oyunçularla necə işləyir. Vaxt gələcək Rza Cəfərov da, Emil Balayev də oynayacaq. Baş məşqçi kimi bu gün seçimim Piriç idi. Qol buraxmadığı üçün, demək olar, doğru seçim idi. Nəticə fərqli olsaydı, digər oyunçulara da şərait yaratmaq haqda düşünərdim.

- Komandada eyni səviyyədə 22-23 futbolçu var. “Şerif” və “Krivbass”da belə imkanınız olub?

- 22 futbolçu var, toplanışda da gördüz ki, hamısı oynamaq istəyir. Pis oyun göstərmədilər. Həmin vaxt basqı da az idi. Amma gözəl oynadılar. Burdakı heyət "Krivbass"dakından daha güclüdü. Amma onların başqa üstünlüyü var idi - qələbədən baqa heç nə istəmirdilər. Nəticədə bürünc medal qazandılar. Ümid edirəm ki, bizim oyunçular da belə olacaq. Nəticə üçün ac olmaq lazımdı. İstəyərdik ki, ən yuxarıda olaq. Amma ən azı başlanğıc üçün hansısa nəticə göstərməlidilər.

- Söz verirsiz ki, "Neftçi"yə uğur qazandıracaqsız?

- İnanmasaydım, burda olmazdım. Həyatda ən önəmlisi nəyəsə inanmaq və arzulamaqdı. Bunlar olmasa, həyatın nə mənası?!

MÜZƏFFƏR QULUZADƏ