"Səbail" Misli premyer-liqasının evdə keçirilən 20-ci tur matçında "Kəpəz"ə qalib gəldi - 1:0.

"Football-plus.az" xəbər verir ki, "dənizçilər"in baş məşqçisi Cavid Hüseynov oyunsonrası mətbuat konfransında jurnalistlərin suallarını cavablandırdı.

- Aşağı pillələrdə çox gərgin mübarizə gedir. Bu üzdən matça psixoloji cəhətdən daha yaxşı hazırlaşmaq vacib idi. Oyunçularımı təbrik edirəm. Xarakter göstərdilər. İki fərqli hissə izlədik ki, bu, normaldı. Birinci yarıda bir neçə qol epizodumuz oldu. Rəqibin ikinci hissədə irəli atılacağını bilirdik. Yekun nəticənin xeyrimizə olduğuna görə sevincliyik. Oyun planının üzərində daha çox çalışmalıyıq. Bunun fərqindəyik.

- Qış fasiləsindən sonra komandada yüksəliş yaşanır. Bunu nəylə əlaqələndirmək olar?
- Mən "Səbail"ə baş məşqçi təyin olunanda qış fasiləsinə 5 tur qalmışdı. Bunlardan üçündə yuxarı pillələrdə qərarlaşan rəqiblərlə üz-üzə gəldik. Oyunlara taktiki cəhətdən hazırlaşmaq üçün yetərincə vaxt yox idi. İndi bu yöndə xeyli inkişaf etmişik. Yüksəliş gözlənilən idi.

- Yeni transferlər olacaq?
- Güclənmək istəyirik. Bu yöndə işlər gedir. İki futbolçu lazımdı.

- Hansı mövqe üçün futbolçu axtarılır?
- Həm hücum, həm də müdafiə xəttini gücləndirmək istəyirik. Rəqabətin səviyyəsini artırmaq üçün hər mövqeyə iki oyunçu lazımdı.

KƏNAN BAHADIR