Entoni Musaba, Matteo Genduzi və Mərt Günok kimi isimləri heyətinə qatmaqla qış transfer dönəminə çox sürətli başlayan “Fənərbaxça” daha bir mühüm keçidi tamamlamağa yaxındı.

"Football-plus.az" xəbər verir ki, “Fənər” fanatları ən qısa müddətdə xoş xəbər alacaq. Söhbət “Əl-İttihad”ın fransalı ulduzu Nqolo Kantedən gedir.

İstanbul nəhəngi bu transferi tamamlamaq üçün həftənin əvvəlindən bəri əlindən gələni edir. Dünya çempionu ilə ilk təmas pozitiv alındıqdan sonra klubun rəsmiləri – idarə heyətinin üzvü Ərtan Torunoğulları və idman direktoru Devin Özək Səduiyyə Ərəbistanına yollandılar. Onlar Kante ilə eyni məkanda görüntüləndilər.

“Fanatik” nəşrinin məlumatına görə bu görüş zamanı “Fənər” rəsmiləri həm Kantenin özü, həm də onun meneceri ilə bütün prinsipial məsələlərdə anlaşaraq masadan qalxdılar.

2023-cü ildən “Əl-İttihad”ın şərəfini qoruyan 34 yaşlı ünlü yarımmüdafiəçinin klubla müqavilə müddəti mövsümün sonunda başa çatır. Kante artıq Səudiyyə Ərəbistanında qalmaq istəmir. Onun “Əl-İttihad”ın illik 12,5 milyon avroluq maaş təklifini geri çevriməsi də bunu təsdiq edir. İndi “sarı-lacivərdlilər”ə bu transferdə yalnız İngiltərə klubları mane ola bilər. Kanteyə İngiltərədən də maraq göstərənlər var. Ancaq ingilislərin heç biri ona “Fənər” qədər maaş təklif etmir. Həm də Kante özü “Əl-İttihad” rəhbərliyinə “Fənər”lə artıq anlaşdığını və bu qərarını dəyişməyəciyini bildirib. Bu məqam, sözsüz, İstanbul nəhənginin mövqeyini gücləndirir.

Maaş məsələsinə gəlincə, “Fənər” dünya çempionuna illik 5 milyon avro maaş və bonuslar təklif edib. Anlaşmanın neçə illik olacağı barədə dəqiq məlumat yoxdu. Bu mövsümün ikinci dövrəsi üçün Kanteyə 2,5 milyon avro maaş veriləcək. Artıq klubda hər kəs ünlü futbolçunun İstanbula ayaq basacağı tarixi gözləyir.

Yeri gəlmişkən, “Fənərbaxça” İrfan Can Kahvecinin ardından Cenk Tosunla da yollarını ayırıb. Məlum olduğu kimi, hər iki futbolçu noyabrın əvvəllərindən eitbarən baş məşqçi Domeniko Tedeskonun tələbi ilə əsas heyətdən kənarlaşdırılmışdı. Bir neçə gün öncə klubdan verilən məlumatda İrfan Canın mövsümün sonuna qədər “Kasımpaşa”ya icarəyə verildiyi qeyd olunmuşdu. Cenklə isə müqavilə qarşılıqlı şəkildə ləğv edilib. Rəsmi qərarın ən qısa şəkildə açıqlanacağı gözlənilir.

İddialara inansaq, Cenklə İrfan Can Kahvecinin yolları yenidən kəsişməyə yaxındı. Çünki təcrübəli futbolçu da “Kasımpaşa” ilə anlaşmaq üzrədi. 2024-ün yayında “Beşiktaş”dan ayrılaraq sərbəst futbolçu statusunda “Fənər”ə gələn Cenkin burda karyerasının uğurlu alındığını söyləmək çətindi.

Joze Mourinyonun dönəmində yalnız 3-cü forvard statusunda olan və heç cür əsas heyətə düşə bilməyən 34 yaşlı futbolçu “sarı-lacivərdlilər”də cəmi 29 rəsmi oyuna çıxaraq hesabına 2 qol, 2 məhsuldar ötürmə yaza bildi.