Yarımmüdafiənin mərkəzini fransalı Matteo Genduzi ilə gücləndirən ''Fənərbaxça'' ilə bağlı yeni sürpriz xəbər yayılıb.

"Football-plus.az" xəbər verir ki, İstanbul nəhəngi indi də Genduzinin həmyerlisi, tanınmış yarımmüdafiəçi Nqolo Kanteni transfer etmək istəyir. Hətta artıq onun klubu ''Əl-İttihad''a rəsmi təklif də irəli sürülüb.

Bu xəbəri türkiyəli insayder Yağız Sabuncuoğlu paylaşıb. İtaliyalı jurnalist Matteo Moretto da bunu təsdiqləyib.

Bu gün, yanvarın 13-də ''Fənər'' rəhbərliyi Kantenin meneceri ilə çox mühüm bir görüş keçirəcək. Məsələnin maddi detalları barədə məlumat yoxdu.

Kantenin ''Əl-İttihad'' ilə müqaviləsinin müddəti mövsümün sonunda başa çatacaq. Səudiyyə Ərəbistanı nəhəngi bir neçə dəfə ona yeni müqavilə təklif etsə də, Kante bunların heç birinə müsbət cavab verməyib. Onun yenidən Avropaya qayıtmaq istədiyi deyilir.

Daha öncə uzun illər ''Çelsi''də forma geymiş 34 yaşlı futbolçu 2023-dən ''Əl-İttihad''ın şərəfini qoruyur. Fransa yığması ilə DÇ-2018-in qalibi olmuş Kante karyerası ərzində 533 rəsmi oyuna çıxaraq 33 qol, 39 məhsuldar ötürmə ilə fərqlənib.