Tunis yığmasında baş məşqçi problemi həlini tapıb. Yerli federasiya bu haqda rəsmi məlumat yayıb.

"Football-plus.az" xəbər verir ki, yığmaya Sabri Lyamuşinin təyin olunduğu açıqlanıb.

Fransalı mütəxəssis bir neçə gün əvvəl istefaya göndərilən Sami Trabelsini əvəzləyib. Yeni baş məşqçinin əsas hədəfi milli komandanı bu il keçiriləcək dünya çempionatına hazırlamaqdı. Tunis yığması mundialda Yaponiya, Niderland və Avropada pley-off mərhələsinin qalibi (Ukrayna, İsveç, Polşa və ya Albaniya) ilə qarşılaşacaq.

Xatırladaq ki, Lyamuşi daha əvvəl Kot d’İvuar yığmasını çalışdırıb. O, “Renn” (Fransa), “Nottingem Forest” (İngiltərə), “Kardiff Siti” (Uels), “Əl-Duhail” (Qətər), “Ər-Riyad” və “Əl-Diriya” (hər ikisi Səudiyyə Ərəbistanı) klublarında da işləyib.