Bu gün axşam saatlarında futbol ictimaiyyətinin diqqəti Dohadakı mərasimə yönəlmişdi.

Qətərin paytaxtında bu ölkədə ilk dəfə təşkil ediləcək DÇ-2022-nin final mərhələsinin püşkü atıldı.

Noyabrın 21-dən dekabrın 18-dək davam edəcək mundialın 32 iştirakçısından hələ ki 29-u məlumdu. Son 3 komandanın adına iyunda aydınlıq gələcək. Avropa zonası üzrə pley-offun Şotlandiya - Ukrayna yarımfinal oyununun qalibi finalda Uelslə, Asiya zonası üzrə Birləşmiş Ərəb Əmirlikləri - Avstraliya cütünün qalibi qitələrarası pley-offda Peru (Cənubi Amerika), Okeaniya zonasının qalibi Yeni Zelandiya isə Kosta Rika (Şimali və Mərkəzi Amerika) ilə qarşılaşacaq.

Komandalar ənənəyə uyğun olaraq püşkdən əvvəl səbətlərə ayrılmışdılar. Komandalar (ev sahibi Qətər istisna olmaqla) FİFA-nın martın 31-də açıqlanan reytinq cədvəlindəki mövqeyinə əsasən 4 səbətə salınmış, hər bir səbətdə 8 iştirakçı (məlum səbəbdən sonuncu səbət istisna olmaqla) yer almışdı:

1-ci səbət: Qətər (ev sahibi), Braziliya, Belçika, Fransa, Argentina, İngiltərə, İspaniya, Portuqaliya.

2-ci səbət: Meksika, Niderland, Danimarka, Almaniya, Uruqvay, İsveçrə, ABŞ, Xorvatiya.

3-cü səbət: Seneqal, İran, Yaponiya, Mərakeş, Serbiya, Polşa, Koreya, Tunis.

4-cü səbət: Kamerun, Kanada, Ekvador, Səudiyyə Ərəbistanı, Qana, Avropanın pley-offunun qalibi, Asiya - Cənubi Amerika pley-offunun qalibi, Şimali və Mərkəzi Amerika - Okeaniya pley-offunun qalibi.

Mundialın püşkatma mərasimi Bakı vaxtı ilə saat 20.00-da başladı. Milyonlarla futbolsevərin səbirsizliklə gözlədikləri qrupların tərkibini 8 futbol adamı müəyyənləşdirdi.
Azərbaycan əsilli iranlı sabiq hücumçu Əli Daei, Adel Ahmed Malallah (Qətər), Kafu (Braziliya), Cey-Cey Okoça (Nigeriya), Bora Milutinoviç (Serbiya), Lotar Matteus (Almaniya), Rabah Macer (Əlcəzair) və Tim Keyhillin (Avstraliya) səbətlərdən çıxardığı şarların formalaşdırdığı qrupların tərkibi belə oldu.

A qrupu: Qətər, Ekvador, Seneqal, Niderland.
B qrupu: İngiltərə, İran, ABŞ, Şotlandiya/Ukrayna/Uels.
C qrupu: Argentina, Səudiyyə Ərəbistanı, Meksika, Polşa.
D qrupu: Fransa, BƏƏ/Avstraliya/Peru, Danimarka, Tunis.
E qrupu: İspaniya, Almaniya, Yaponiya, Yeni Zelandiya/Kosta Rika.
F qrupu: Belçika, Kanada, Mərakeş, Xorvatiya.
G qrupu: Braziliya, Serbiya, İsveçrə, Kamerun.
H qrupu: Portuqaliya, Qana, Uruqvay, Koreya.