Qabon hökuməti bu ilin əvvəlində ölkənin milli komandası ilə bağlı verdiyi qərarların bir hissəsini ləğv edib. Nəticədə Qabon yığmasının sanksiyaya məruz qalmaq ehtimalı aradan qalxıb.

"Football-plus.az" xatırladır ki, milli komanda Mərakeşdə təşkil edilən Afrika Millətlər Kubokunda (AMK) mübarizəni erkən dayandırmışdı. F qrupunda Kot d’İvuar (2:3), Kamerun (0:1) və Mozambikə (2:3) qarşı keçirdiyi bütün oyunlarda məğlub olan Qabonun uğursuzluğunun bir qədər gözlənilməz olduğu vurğulanmalıdı. Bu ölkənin hökumətinin milli komanda ilə bağlı radikal qərarlar qəbul etməsi bütün dünyada böyük əks-səda doğurmuşdu.

Belə ki, yığmanın məşqçilər korpusunun bütün üzvləri istefaya göndərilmiş və yığmanın fəaliyyəti qeyri-müəyyən müddətə dayandırılmışdı. Bununla yanaşı, aparıcı futbolçular Pyer-Emerik Obameyanq ilə Bruno Ekuele Manqa yığmadan birdəfəlik uzaqlaşdırılmışdılar.

Qeyd edək ki, kapitanı Obameyanq qrup mərhələsinin 2-ci turunun Mozambik ilə oyunundan sonra düşərgəni tərk edərək klubu “Marsel”ə qayıtmışdı.

Qabon hökuməti ilin əvvəlində verdiyi qərarlara yenidən baxmalı olub. Yerli futbol federasiyasının bununla bağlı yaydığı məlumatda Qabon yığmasının buraxılması və oyunçular Obameyanq ilə Manqanın komandadan birdəfəlik kənarlaşdırılması ilə bağlı qərarların ləğv edildiyi bildirilib. İdman naziri Pol Ulrix Kessaninin federasiyaya ünvanladığı məktubda qarşıdakı futbol hadisələrinin, xüsusilə də AMK-2027-nin seçmə turnirinin püşkatma mərasiminin vacibliyi vurğulanıb.

Başqa sözlə, hökumət futbola müdaxiləsinə görə Afrika Futbol Konfederasiyası və FİFA-nın gözlənilən sanksiyalarından təlaşa düşərək qərarlarına yenidən baxmağa məcbur olub.