Bundesliqanın ardından bazar günü 2-ci bundesliqada da mövsümə yekun vuruldu.

"Football-plus.az" xəbər verir ki, özü də elitada olduğu kimi burda da dramatik anlar yaşandı. ''Darmştadt'' artıq elitaya vəsiqəni rəsmiləşdirmişdi. Digər vəsiqəyə isə ''Hamburq''la ''Haydenhaym'' iddialı idi. Onların hər ikisi son turu səfərdə keçirirdi. 2018-dən bu yana bundesliqaya qayıtmağa çalışan ''Hamburq'' ''Sandhauzen''i 1:0 hesabı ilə məğlub etdikdən sonra bu klubun fanatları böyük sevinc içində meydana axışdılar. Onlar bir-birilərini təbrik edirdilər. Çünki ''Haydenhaym'' ''Reqensburq''la görüşün 90-cı dəqiqəsinə 1:2 geridə daxil olmuşdu. Amma bu qarşılaşmada hakim əsas vaxta 11 dəqiqə əlavə etdi. Nəticədə ''Haydenhaym'' 90+3 və 90+9-cu dəqiqələrdə vurduğu qollarla 3:2 hesabı ilə qalib gəldi! Yəni elitaya vəsiqə məhz bu kluba qismət oldu. 3-cü yeri tutan ''Hamburq'' isə ''Ştutqart'' ilə pley-offda qarşılaşmalı olacaq.

Xatırladaq ki, ''dinozavrlar'' ötən mövsüm də pley-off oynamaq məcburiyyətində qalmış və ''Herta''ya boyun əymişdilər.