Əfran İsmayılov iki od arasında - işə ağsaqqallar da qarışacaq!
Əfran İsmayılovun başından qeylü-qal əskik olmur. Gah DYP-nin qəzəbinə tuş gəlir, maşını əlindən alınır, gah da...
Hə, indi haqqında bəhs edəcəyimiz məsələsini “gah da”ya aid etmək olar. Ötənlərin məşhur futbolçusunun eyni zamanda iki klubda çalışması narazılıq doğurur. AFFA “Şəfa” rəhbərliyinə bununla bağlı iradını çatdırıb. Onun həm “Şəfa”da, həm də “Araz-Naxçıvan”da işləməsinin yolverilməz olduğu, bu yöndə seçim etməsinin vacibliyi bildirilib.
Xatırladaq ki, İsmayılov “Şəfa”da prezident müşaviri, “Araz-Naxçıvan”da isə baş məşqçinin köməkçisi vəzifəsində çalışır.
“Şəfa”nın prezidentinin müşaviri İlkin Əliyevlə əlaqə saxladıq, bu məsələyə münasibət bildirməsini istədik. O, ilk cəhdimizdə belə dedi ki, tezliklə əlaqə saxlayacaq. Sonra isə bizə Əfran bəylə danışmağı məsləhət gördü. Danışaq da:
“Birincisi, belə şey yoxdu. “Şəfa” rəhbərliyində olanlar mənim dostumdu, qardaş kimiyik. Məsləhətləşirik, dərdləşirik. Çayxanada otururuq, məsləhət alırlar məndən. Klub rəhbəri bizesmendi. Soruşur ki, necə premyer-liqaya çıxaq. Həm “Araz-Naxçıvan”la elitaya yüksəlmişik, həm də “Qarabağ”da futbolçu təcrübəm var. İnkişaf strategiyası ilə bağlı məsləhət alır. Amma mən “Araz-Naxçıvan”da rəsmi məşqçiyəm. Gələcəklə bağlı qərara qalanda böyüklər var, ağsaqqallar var. Hazırda məşqçiyəm, belə davam etmək istəyirəm. Amma bu qərar gələcəkdə dəyişə bilər. İdarəçi kimi də işləyə bilərəm”.
MÜZƏFFƏR QULUZADƏ 
Digər xəbərlər
