Gözlənilən kimi də oldu: azərbaycanlı Ülvi Babayevə “Dinamo”nu atıb “Spartak”a qoşulmaq arzusu baha başa gəldi.

“Dinamo”ya rəhbərlik edənlər ona paytaxtın digər təmsilçisinə keçidin yolverilməz olduğunu anlatmış, eyni yolu seçən başqa futbolçuların acı taleyini xatırlatmışdılar. Amma Ülvi heç kimi eşitmədi: görünür, qırmızı-ağ forma geymək həvəsi hər şeyə üstün gəldi.

Bu gün Birləşmiş Ərəb Əmirliklərinə - toplanışa yollanan “Dinamo”nun heyətində Ülvi Babayev yer almayıb. Aparılmamaq bir yana, hətta 21 yaşlı azərbaycanlı yarımmüdafiəçinin adını komandanın çatından da çıxarıblar.

Ülvinin “Dinamo” ilə müqaviləsinin müddəti 2026-nın yayında bitir. Qeyri-adi nəsə baş verməsə, daha doğrusu, “dinamoçular” problem yaratmasa, soydaşımızın “Spartak”la 2030-cu ilə qədər müqavilə bağlaması gözlənilir. Bu məqam öz yerində. Sadəcə, bir azərbaycanlı futbolçunun hələ düz-əməlli parlamadan qalmaqalla üzləşməsi heç də yaxşı hal deyil. Özü və karyerası baxımından!

ORXAN