Çox təəssüf ki, Ülvi Babayev Azərbaycan yığmasını seçmədi. Əlbəttə, zorla gözəllik olmur, Ülvinin qəlbində ölkəmizlə bağlı heç bir ülvi hiss yoxdu. Amma bu məqam gənc soydaşımızın uğurlarına sevinməməyimiz anlamına gəlməsin.

Dünən Rusiya kubokunda 1/4 final mərhələsinin ilk oyunları keçirilib. Ülvinin şərəfini qoruduğu, Valeri Karpinin çalışdırdığı “Dinamo” ölkə futbolunun nəhəngi “Zenit”in qonağı olub. Azərbaycanlı xavbek moskvalıların start heyətində yer almasa da, Mauxubun zədələnməsi üzündən 35-ci dəqiqədə meydana çıxıb. Məhz Ülvi 84-cü dəqiqədə təkbətəkdən yararlanaraq “Dinamo”nu önə keçirib. Bu, onun son iki kubok oyunundakı 4-cü qolu olub. 90+3-cü dəqiqədə daha bir qol vuran paytaxt təmsilçisi inamlı qələbə qazanıb.

Cavab görüşü noyabrın 27-də keçiriləcək.

ORXAN