Rusiyanın U-21 millisinin Qırğızıstanda keçirilən turnirdə iştirak etdiyini xəbər vermişdik.

Təbii ki, bu mövzuya toxunmağımızın səbəbi var: Moskva "Dinamo"sunun şərəfini qoruyan azərbaycanlı futbolçu Ülvi Babayev da bu yığmanın formasını geyir. Xatırladaq ki, o iranlı gənclərlə oyunda (2:0) fərqlənə bilməsə də, Bəhreynlə üz-üzə gəldikləri görüşdə dubl edib. 90+9 və 90+11-ci dəqiqələrdə qollar vuran hücumçu komandasının 2:0 hesablı qələbə qazanmasına nail olub.

Ülvi dünən Qırğızıstanla oyunda da uğurlu çıxış edib. Soydaşımız 19-cu dəqiqədə hesabı açıbsa, 43-cü dəqiqədə də məhsuldar ötürmə verib. Hücumçu bununla Kirill Stolbovun adını tabloya yazdırmasına şərait yaradıb. Ülvi 62-ci dəqiqədə sol cinah müdafiəçisi Nikita Saltikovla əvəzlənib. Matç rusların 8:0 hesablı qələbəsiylə sona çatıb.

Beləliklə, U-21 turniri qələbələrlə başa vurdu. 3 oyunda 3 qol, 1 məhsuldar ötürmə ilə yadda qalan Ülvi üçün isə əsas yığmaya aparan yolda maneə görünmür.

KƏNAN BAHADIR