Son olaraq kubokda ''Göztəpə''yə uduzan və bu mövsüm üçün heç bir ciddi hədəfi qalmayan ''Beşiktaş'' yeni mövsüm üçün transfer çalışmalarını davam etdirir.

''Football-plus.az'' Türkiyə mətbuatına istinadən xəbər verir ki, İstanbul nəhəngi karyerasını Səudiyyə Ərəbistanı təmsilçisi ''Əl-İttihad''da davam etdirən Nqolo Kanteyə ciddi maraq göstərir. İddialara görə ''ağ-qaralar''ın çalışdırıcısı Ole Qunnar Sulşer artıq telefonla bu futbolçu ilə söhbət edərək onu Türkiyəyə dəvət edib.

Kante həmin söhbətdə Səudiyyə Ərəbistanından ayrılmaq istədiyini, Avropaya qayıtmaq arzusunda olduğunu bildirib. Ancaq tanınmış futbolçunun maaşı çox yüksəkdi. O, ''Beşiktaş''ın təklifini qəbul edərək Türkiyəyə gəlməyə razılıq versə, çox ciddi fədakarlıq etməli olacaq.

33 yaşlı futbolçunun ''Əl-İttihad'' ilə müqaviləsinin müddəti 2026-cı ilin iyunun 30-na qədər nəzərdə tutulub. Premyer-liqada həm ''Lester'', həm də ''Çelsi'' ilə çempion olmuş Kante Fransa ilə DÇ-2018-i də qazanıb.

Bu mövsüm o, ''Əl-Ittihad''ın heyətində 25 rəsmi oyunda forma geyərək aktivinə 3 qol, 3 məhsuldar ötürmə yazıb.