Bəzi həmkarlarımızın iddiasına inansaq, futbol üzrə ölkə çempionatının 1-ci liqasının 12-ci turunda keçirilən “Səbail” – “Şimal” oyunu (3:4) şübhəli nəticə baxımından “radara düşüb”.

Belə ki, AFFA həmin oyunu nəzarətə götürüb və araşdırma aparılır. Hətta bununla bağlı UEFA-nın müvafiq instansiyalarına məlumat verilib. Əvvəlcə onu bildirək ki, sözügedən oyunda 43-cü dəqiqədə hesabı “Səbail” açsa da, ikinci hissədə qonaqlar 4 qol (48, 54, 60 və 65-ci dəqiqələrdə) vurub. Bundan sonra “dənizçilər” daha iki dəfə fərqlənsə də, məğlubiyyətdən xilas ola bilməyib. Maraq üçün onu da qeyd edək ki, Xaçmaz təmsilçisi bu mövsüm qazandığı 5 xaldan 4-nü “Səbail”dən qoparıb. Axı komandaların ilk dueli də qolsuz “sülh”lə nəticələnmişdi.

AFFA-nın həqiqətən də bu matçı nəzarətə götürüb-götürmədiyini öyrənmək məqsədilə qurumun Mətbuat və İctimaiyyətlə Əlaqələr departamentinin rəhbəri Murad Axundova müraciət etdik. Federasiya rəsmisi qəzetimizə açıqlamasında çempionatlarda bu cür rast gəlinəndə əvvəlcədən hansısa məlumat verilmədiyini, yalnız araşdırmanın hansı cəzalarla nəticələndiyi haqda bilginin paylaşıldığını bildirdi. Kəsəsi, gerçəyi öyrənmək mümkün olmadı.

KƏNAN BAHADIR