Əslən azərbaycanlı olan Ülvi Babayevin Rusiyanın U-21 yığmasına çağrıldığını xəbər vermişdik. Moskva "Dinamo"sunun şərəfini qoruyan futbolçu bununla həm də qısa müddətdə doğulub boya-başa çatdığı ölkənin əsas yığmasına ayaq aça bilmək imkanına malikdi. Bu öz yerində.

İş ondadı ki, Ülvini AFFA da miliyə cəlb etmək istəmiş, hətta bu məqsədlə Bakıda futbolçunun atasıyla görüş həyata keçirildiyi haqda xəbərlər yayılmışdı. Ancaq yerli federasiya şimal qonşumuzla mübarizəni "uduzdu".

Bu məqamlarla bağlı mövqeyini öyrənmək məqsədilə AFFA-nın Mətbuat və İctimaiyyətlə Əlaqələr şöbəsinin rəhbəri Murad Axundova müraciət etdik. Qurum rəsmisi "Football-plus.az"a açıqlamasında Ülvinin artıq Rusiyanın U-21 millisinin üzvü olduğunu bildirərək əlavə şərh vermək istəmədiyini dilə gətirdi. Bununla belə, o, federasiyanın Ülvinin Azərbaycan yığmasına cəlb olunması yönündə işlər gördüyü haqda iddiaları təkzib etmədiklərini vurğuladı.

Xatırladaq ki, Rusiyanın U-21 yığması noyabrın 11-də Qırğızıstana yollanacaq. Orda, yəni ölkənin cənubundakı Oş şəhərində Rusiya, İran, Qırğızıstan və Bəhreyn yığmalarının iştirakıyla beynəlxalq turnir keçiriləcək.

KƏNAN BAHADIR