Narkotiklərdən istifadə və dövriyyəyə buraxılması əleyhinə əməliyyat zamanı “Fənərbaxça” prezidenti Sadəttin Saranın iki dəfə saxlanılaraq ifadə verməsinin və sərbəst buraxılmasının ardından futbolda pul qoyuluşu qalmaqalında da yeni olaylar yaşandı.

"Football-plus.az" xəbər verir ki, 14-ü futbolçu olmaqla daha 29 şəxsin saxlanılması ilə bağlı qərar verildi. 29 nəfərdən 24-ü saxlanılaraq ədliyyəyə gətirildi. Enes Baratan adlı şəxs zatən başqa bir olay üzündən həbsxanada olduğundan onun saxlanılmasına ehtiyac qalmadı. 4 nəfərin isə ölkə xaricində olduğu müəyyənləşdi və onların da yaxalama çalışmaları davam etdirilir.

Bu dəfə saxlanılanlar arasında ən diqqətçəkən şəxs, heç şübhəsiz, Ərdən Timurdu. 44 yaşlı iş adamı “Qalatasaray”ın sabiq başqan vəkilidi. O, 2022-24-cü illərdə İstanbul nəhəngində çalışmış və fanatların sevimlisinə çevrilmişdi. Mauro İkardi başda olmaqla bir çox ulduzun transferində önəmli rol oynayan Timur kluba həm də mühüm sponsorlar qazandırmışdı.

Onunla bağlı iddialara gəlincə, Timur hansısa oyunun nəticəsinə təsir göstərməkdə və ya oyun satmaqda günahlandırılmır. İddialara inansaq, onun bank hesablarına qaynağı bukmekerlər olan şübhəli pullar yatırılıb. Timur bəzi əməliyyatlar edərək pulun qaynağını gizlətməyə çalışıb. Eləcə də onun maliyyə durumu ilə bağlı başqa şübhələr mövcuddu. Bundan başqa, superliqa təmsilçisi “Eyüpspor”un vitse-prezidenti Fatih Kulaksız da saxlanılanlar arasındadı.

Daha öncə bu klubun prezidenti Murat Özkaya həbs olunmuşdu.

Bu arada İstanbul Cümhuriyyət Prokurorluğunun son saxlanılanlarla bağlı rəsmi açıqlamasında qeyd olunan bir qarşılaşma diqqət çəkir. Özü də söhbət aşağı liqa oyunlarından yox, superliqa matçından, daha dəqiqi, ötən il oktyabrın 26-da keçirilən “Kasımpaşa” – “Samsunspor” oyunundan gedir.

Saxlanılanlardan 6-sı bu matçın nəticəsinə əvvəlcədən təsir göstərməkdə günahlandırılır! Həmin oyunda “Samsunspor” ilk yarıda iki penalti qaçırmış və “Kasımpaşa” fasiləyə minimal üstünlüklə yollanmışdı. 67-ci dəqiqəyə qədər hesabda geridə olan Samsun təmsilçisi matçın son bölümündə dirçələrək 4 qol vurmuş və 4:1 hesablı qələbə qazanmışdı.

Jurnalist Murat Ağırel daha öncə bu oyunla bağlı çox diqqətçəkən iddialar səsləndirmişdi. O, bir nəfərin “Kasımpaşa” ilk yarını öndə tamamlayacaq, oyunu “Samsunspor” qazanacaq” mərcinə ciddi pul qoyuluşu etdiyini açıqlamışdı. Həmin şəxs əmsalı 34,5 olan bu mərcə 50 min lirə yatırmış və 1 milyon 725 min lirə qazanc əldə etmişdi! Eyni mərcə daha 238 nəfərin də pul qoyuluşu etdiyi məlum olmuşdu.