Türkiyə futbolu qeyri-qanuni pul qoyuluşları qalmaqalı ilə çalxalanmaqda davam edir.

"Football-plus.az" xəbər verir ki, İstanbul Cümhuriyyət Baş Prokurorluğu ötən aydan bəri davam edən prosesin belə desək, ikinci pərdəsi ilə bağlı yeni məlumatları ictimaiyyətə açıqlayıb.

İlk dalğa zamanı noyabrın 13-də Nizam-İntizam Komitəsi tərəfindən 101 peşəkar futbolçuya cəza verilmişdi. Onlar müxtəlif müddətə futboldan kənarlaşdırılmışdı. Araşdırmanın genişləndirilməsi və bukmeker saytlarından yeni məlumatların əldə olunması sayəsində 46 futbol adamının saxlanılmasına qərar verilib. Onlardan bəziləri ölkə xaricində olduğundan, yalnız 35-i saxlanılaraq polis şöbəsinə gətirilib.

Bu qərar futbol ictimaiyyətində şok effekti verib. Çünki saxlanılanlar arasında ölkəmizdə də kifayət qədər tanınan sabiq hakim və şərhçi Ahmet Çakar, eləcə də “Qalatasaray”lı Metehan Baltacı, “Fənərbaxça”nın kapitanı (!) Mərt Hakan Yandaş, “Adana Dəmirspor”un sabiq prezidenti Murat Sancak və FİFA hakimi Zorbay Küçük də var. 2023-cü ilin dekabrında keçirilən “Ümraniyəspor” – “Girəsunspor” matçının nəticəsinin əvvəlcədən razılaşdırılması üzündən biri futbolçu olmaqla 6 nəfər, 2024-ün aprelində keçirilən “Ankaraspor” – “Nazilli Bələdiyəspor” matçının nəticəsinə təsir göstərməkdə şübhəli bilinən 5 nəfər saxlanılıb. Söhbət hər iki klubun baş məşqçilərindən və prezidentlərindən gedir!

“Qalatasaray”lı və “Fənər”li futbolçulara gəlincə, Metehan noyabrda NİK tərəfindən 90 günlük cəza almışdı. Gənc futbolçu həmin vaxt karyerasının əvvəlində pul qoyuluşları etdiyini boynuna almışdı. Amma indi onunla bağlı yeni faktlar ortaya çıxıb. Metehan Baltacı bu dəfə öz oynadığı kluba pul qoyuluşu etməkdə günahlandırılır! Çox güman, söhbət onun “Eypüspor”da oynadığı dönəmdən – 2023/24 mövsümündən gedir. Bu günahı sübuta yetiriləcəyi təqdirdə 23 yaşlı müdafiəçi hətta həbs cəzası da ala bilər. “Qalatasaray” onunla bağlı yekun qərarını araşdırma bitəndən sonra verəcək.

Metehandan başqa daha 27 futbolçu öz klubuna pul qoyuluşu etməkdə günahlandırılaraq saxlanılıb. Mərt Hakan Yandaş isə belə desək, başqasının əli ilə pul qoyuluşu etməkdə günahlandırılır. Hətta onun evində axtarış həyata keçirilib. Zorbay Küçük, Ahmet Çakar və Murat Sancakın isə bank hesabları incələndikdə onların çox anormal gəlirlərinin olduğu üzə çıxıb. Onların saxlanılma səbəbi yalnız budu. Bu pulun mənşəyi bəlli deyil.

Bu siyahıda Zorbay Küçükün də olması çox maraq doğurur. Çünki əvvəlki illərdə önəmli derbi matçlarına təyinat almış FİFA hakimi ötən ay hakimlərə qarşı aparılan əməliyyat zamanı cəza almamışdı. Əksinə, Küçük prokurorluğa gələrək açıqlamalar vermiş və başqa şəxslərin onun adından bukmeker saytında hesab açaraq pul qoyuluşu etdiklərini bildirmişdi.

O da vurğulanırdı ki, Zorbay Küçükün günahı sübuta yetirilmədiyinə görə o, cəzadan canını qurtaracaq və hətta tezliklə yenidən superliqa oyunlarına təyinat alacaq. Bu söhbətlərin fonunda onun yenidən saxlanılması böyük müzakirələrə səbəb olub. Türkiyənin ədalət naziri Yılmaz Tunç məsələ ilə bağlı qısa açıqlama verərək olayı sona qədər təqib edəcəklərini vurğulayıb. O, qarşıdakı həftədə prokurorluqdan yeni açıqlamaların veriləcəyini bildirib.