Misli premyer-liqasında mövsümün ilk 16 turu həm də bəzi baş məşqçilərin oyunların keçirildiyi stadionların durumuyla bağlı narazılıqlarıyla müşayiət olundu.

Bu sırada daha çox “Zirə”nin baş məşqçisi Rəşad Sadıqovu, “Sabah”ın çalışdırıcısı Valdas Dambrauskası gördük. Əsas etiraz isə Tovuz və Yevlax şəhər stadionları, həmçinin Quba Olimpiya İdman Kompleksinin stadionuyla bağlı oldu.

Maraqlıdı, bəs ev oyunlarını bu idman qurğularında keçirən klublar qış fasiləsindən yararlanaraq problemləri aradan qaldırmağa çalışacaqlarmı?

Bu sualla həmin klubların rəsmilərinə müraciət etdik. “Turan Tovuz”un mətbuat xidmətinin rəhbəri Süleyman Tağıyev qəzetimizə açıqlamasında bildirdi ki, növbəti ev oyunu yanvarın 25-də “Sumqayıt”a qarşıdı və həmin vaxta hələ təxminən bir ay qalıb. Yeni salınan təbii ot örtüyünün durumundan məsul olan mütəxəssislər bildirir ki, bu müddət qazonun özünü tam həcmdə yeniləyə bilməsi üçün yetərli olacaq.

Beləliklə, premyer-liqa klubları yanvardan etibarən daha etibarlı və keyfiyyətli ot örtüyü üzərində top qova biləcəklər. Kəsəsi, belədə qazona kənardan müdaxiləyə ehtiyac qalmır. Yəni bu ot örtüyünün yeganə çarəsi gözləməkdi. “Karvan-Yevlax”ın idman direktoru Kənan Kərimovdan isə daha fərqli cavab eşitdik. Belə ki, klub rəsmisinin sözlərinə görə, onlar Yevlax şəhər stadionunun ehtiyat meydançasını təbii ot örtüyü ilə təchiz etmək niyyətindədilər. Daha sonra bura tribunalar quraşdırılacaq. Prosesə gələn ilin yayında start veriləcək. Bununla belə, Kənan bəy Yevlax şəhər stadionunun ot örtüyünün yaxşı vəziyyətdə olduğunu dedi. Əlavə etdi ki, qazon UEFA-nın standartlarına cavab verir və əlavə nəsə etmək niyyətində deyillər.

Ev oyunlarını Qubada keçirən “İmişli”nin mətbuat xidmətinin rəhbəri Leyla Behbudlu isə ot örtüyünün vəziyyətinin yaxşılaşdırılması yönündə addım atdıqlarını söylədi. Daha doğrusu, stadion Gənclər və İdman Nazirliyinin balansında olduğundan klub bu quruma müraciət edib və qış fasiləsində ot örtüyünün durumunun yaxşılaşdırılmasını istəyib, qarşı tərəfdən müsbət cavab alıb. Yəni müvafiq tədbirlər nazirlik tərəfindən görüləcək.

Beləliklə, mövsümün ikinci yarısında stadionların ot örtükləri haqda daha az giley-güzar eşidəcəyimizə ümid edə bilərik. Həqiqəti isə zaman göstərəcək.

KƏNAN BAHADIR