"Turan Tovuz"un yeni ot örtüyüylə bağlı şok problem - komanda yenə Tovuzdan ayrılacaq?
"Turan Tovuz" Misli premyer-liqasının 10-cu tur matçında "Şamaxı"nı məğlub etməklə yenidən liderliyə yüksəldi.
"Bozqurd" bu ev matçını, nəhayət, Tocuz şəhər stadionunda keçirə bildi. Həmin gün yenilənmiş, təbii ot örtüyü ilə təchiz edilmiş idman qurğusunun tribunalarına 5800 azarkeş təşrif buyurdu ki, mövsümün rekordu qeydə alındı. Təbii ki, bu matçda anşlaq olacağına şühhə yox idi. Axı "Turan Tovuz" burdakı son matçını hələ mayın 25-də keçirmişdi. Hər halda, həsrət bitdi və bura qədər hər şey gözəldi.
İş ondadı ki, "Şamaxı"yla görüşdə dəqiqələr bir-birini qovaladıqca təbii ot örtüyünün gözəlliyi itməyə başladı. Üzə çıxdı ki, qazon hələ istifadə üçün tam yararlı deyil. Hətta həm "Şamaxı"nın baş məşqçisi Ayxan Abbasov, həm də "Turan Tovuz"un çalışdırıcısı Kurban Berdıyev klubun bu addımı atmağa tələsdiyini bildirdi. İş ondadı ki, bəzi həmkarlarımız ot örtüyünün dəyişdirilməsini icra edən “Caspian Sport and Landscape” şirkətinin direktoru Fil Şarplesin oyundan əvvəl "Turan Tovuz"un İdarə Heyətinin sədri Ehtiram Quliyevə daha iki həftə gözləməyin vacib olduğunu bildirdiyini iddia edir.
Maraqlıdı, bəs reallıq necədi? Klub həqiqətənmi evə qayıtmağa tələsib? Suallarımızı "bozqurd"un mətbuat xidmətinin rəhbəri Süleyman Tağıyevə ünvanladıq. Onun cavabı:
"İlk oyunda ot örtüyündə müəyyən deformasiyaların olması normaldı. Bunu mütəxəssislər də bildirib. Oyun bitəndən dərhal sonra bərpa işlərinə başlanılıb. Mütəxəssislər növbəti oyuna kimi meydançanı tam hazır vəziyətə gətirmək üçün çalışacaqlar. Təbii ki, hava şəraitinin də bunda xüsusi rolu olacaq".
KƏNAN BAHADIR 
