İlk dövrəni ''Qalatasaray''dan 3 xal geridə tamamlayan ''Fənərbaxça'' qışda heyəti gücləndirmək üçün ciddi çalışmalar həyata keçirir.

Rəsmi müqavilə imzalanmasa da, artıq iki futbolçu - PSV-dən Coui Veerman və ''Samsunspor''dan Entoni Musabanın keçidini tamamlayan Istanbul nəhəngi daha bir futbolçuya görə rəsmi təklif irəli sürüb. Söhbət Ademola Lukmandan gedir.

Türkiyə mətbuatının yazdığına inansaq, hələ ötən həftə ''Atalanta'' rəsmilərindən nigeriyalı futbolçunun transfer şərtlərini soruşan ''Fənər'' rəhbərliyi onun meneceri ilə əlaqə saxlayıb. İddialara inansaq, ''sarı-lacivərdlilər'' 25 milyon avro təklif ediblər. Berqamo klubu isə danışıqlar masasına 40 milyon avro tələbi ilə əyləşib. Hələlik fərq böyük olsa da, tərəflərin anlaşmaq ehtimalının olduğu bildirilir. Hücumda demək olar, hər mövqedə oynamağı bacaran Lukman özü də Türkiyəyə gəlməyin əleyhinə deyil. Hətta şayiələrə inansaq, Lukman İstanbuldakı həyat və Türkiyə futbolu barədə məlumat almaq üçün Nigeriya yığmasında komanda yoldaşı olan Viktor Osimhen, eləcə də ''Everton''da birlikdə top qovduğu Cenk Tosun ilə söhbət edib.

''Atalanta''nın 2022-də ''Leyptsiq''dən 10,8 milyon avroya transfer etdiyi 28 yaşlı vinger bu mövsüm A seriyası və Çempionlar Liqasında iştirak etdiyi 16 qarşılaşmada 3 qol, 1 məhsuldar ötürmə ilə fərqlənib.